Mudende wu ta Tsemiwa eka Lava va Holaka Kun’wana

Hi Themba Chauke

Xiyenge xa Mpfuno wa vaaki xa SASSA, hi ku tirhisana na swiyenge swa swikweleti, va kumile leswaku kwalomu ka 210 000 wa vanhu lava kumaka timali ta mudende va kuma miholo kun’wana leyi va nga tivisangiki Xiyenge lexi.

Ku ya hi nawu wa mpfuno wa vaaki, vanhu lava holaka mudende, hi ku ya hi nawu, va fanele ku nyika vuxokoxoko hinkwabyo byo kuma mali, loko va endla swikombelo ro sungula. Va tlhela va boheleriwa ku tivisa SASSA loko xiyimo xa vona xa swa timali xi cinca endzhaku ka loko swikombelo swa vona swi amukeriwile. Ku tsandzeka ku landzelela swilaveko leswi swi vuriwa ku tlula nawu naswona munhu a nga ha xupuriwa.

Tanihi pfhumba leri, vanhu lava khumbekaka va ta hlwela ku kuma mudende wa Khotavuxika 2025. Vanhu lava va komberiwa ku tihlanganisa na tihofisi ta SASSA, leswaku va ta kambisisiwa ku nga se hela masiku ya 30 kusukela namuntlha. Vanhu lava va nga ta tsandzeka ku endla tano, mudende wa vona wu ta yimisiwa, naswona loko swo heta tin’hweti timbirhi-tinharhu, mudende wu ta tsemiwa.

Ku vuriwa leswaku van’wana vanhu a va lulamerile ku kuma mudende loko va endla swikombelo ro sungula, kambe loko xiyimo xa swa timali xi cinca, vanhu lava a va ha ringanelanga ku kuma mudende. SASSA yi kombela leswaku vanhu hinkwavo lava va kumaka mudende, va fanele ku tivisa SASSA hi miholo leyi va yi kumaka xikan’we na ku nyika vuxokoxoko hinkwabyo bya tibangi leti va nga se ti paluxaka. Kasi na vanhu lava va tirhisaka mapasi ya xibukwana xa rihlaza va tsundzuxiwa ku endla mapasi ya swikhadana ku sivela ku tirhisiwa ka mapasi ya vona eka timhaka ta vuxisi.