Simakade u lava Vuhosinkulu bya MisuZulu

Hi Themba Chauke

Vaseketeri va Hosi ya Rixaka ra Mazulu, Simakade kaZwelithini, lava va vulaka leswaku hi yona Hosinkulu leyi faneleke ku va rhangela, va vula leswaku va ta n’wi nyika nseketelo lowu nga tsekatsekiki xikan’we na ku n’wi navelela mikateko loko a ta tivonakarisa emahlweni ka Khoto ya Swivilelo ya Bloemfontein hi siku ra ti 28 na ti 29 Mudyaxihi 2025. Xivilelo xi endliwile hi Puresidende Cyril Ramaphosa, xo tlhontlha vuahluri bya Khoto ya le Henhla ya Pitori byo kaneta tindlela leti tirhisiweke to veka Hosinkulu ya rixaka ra Mazulu.

Ntlawa lowu wu vula leswaku i nkarhi wa nkoka wa ku fikelela ku navela ka vona na ku kuma ntiyiso, vululami xikan’we na ku kaneta ku vekiwa ka Hosinkulu ya rixaka ra Mazulu loku ku nga ri ki enawini endlwini ya vukosi bya Mazulu.

“Hi tshembha leswaku vuhahluri a byi nge voyameli etlhelo rin’we, xikan’we na ku tekela enhlokweni voko ra nawu. Vanhu va ka hina, matimu ya ka hina, xikan’we na maendlelo ya hina ya xinto swi fanele ku hloniphiwa na ku tekeriwa enhlokweni ehandle ka ku nghenelela ka tipolotiki,” ku vula Freeman Bhengu kusuka eka ntlawa wa vaseketeri va Simakade kaZwelithini lowu tivitanaka ‘ZondaMagwala’.

Simakade kaZwelithini, i n’wana wo sungula wa jaha wa mufi Hosinkulu Goodwill Zwelithini, loyi khoto ya le Henhla ya Pitori yi yimeke na yena hi ku vula leswaku puresidende Ramaphosa a nga landzelelanga tindlela leti faneleke ta maendlelo ya xinto eka ku vekiwa ka Hosinkulu ya rixaka ra Mazulu. Leswi hi swona swi nga endla leswaku mhaka leyi yi fika eKhoto ya Swivilelo ya Bloemfontein hi ku tlhonthliwa hi Puresidende Ramaphosa.

Hosinkulu Misizulu kaZwelithini i n’wana wa jaha wa vumbirhi wa mufi Hosinkulu Goodwill Zwelithini, naswona u vekiwile tanihi Hosinkulu ya Rixaka ra Mazulu hi siku ra 21 Mudyaxihi 2021, kambe a endleriwa ntirho wo n’wi veka Vuhosinkulu hi lembe ra 2022 hi siku ra 20 Mhawuri. Kasi mfumo wu n’wi vekile ximfumo hi siku ra 29 Nhlangula 2022.

Kasi ku vekiwa ka Hosinkulu Misuzulu swi tlhontlhiwile hi swirho swin’wana swa ndyangu, laha swi nga famba tikhoto to hambana-hambana, ku ri matshalatshala yo yimisa ku vekiwa ka yena tanihi Hosinkulu ya rixaka ra Mazulu, ku kondza swi fika laha swi nga kona namuntlha laha Hosinkulu Misizulu kaZwelithini a nga na xitifikheti xa Vuhosinkulu kusuka eka mfumo kambe Simakade kaZwelithini u vula leswaku hi yena Hosinkulu ya ntiyiso ya rixaka ra Mazulu.