SANTACO Yi Rila Rifu ra Mutshamaxitulu

Hi Themba Chauke

Nhlangano wa mathekisi wa Afrika-Dzonga – SANTACO, wu tivisile ximfumo hi ku hundza emisaveni ka mutshamaxitulu wa Nhlangano etikweni, Zola Yolelo. Muvulavuleri wa nhlangano Mmatshikhidi Rebecca Phala u khombisile Yolelo tanihi munhu loyi a tinyiketerile ku kurisa xiyenge xa mathekisi. Loyelo u vuriwa kuva a sungurile hi hlantshwa timovha ku ya eka ku va khondakitara, a tlakuka ku ya fika eka ku va mutshamaxitulu wa Nhlangano wa Mathekisi wa Uncedo Mthatha.

Kusuka kona u vile mutshamaxitulu wa huvo ya mathekisi eka xifundzha xa OR Tambo, a tlakuka ku kondza a va mutshamaxitulu wa nhlangano etikweni hinkwaro hi Mudyaxihi 2022 ku kondza a hundza emisaveni. “U ta tsundzukiwa hi mikarhi hinkwayo eka ku tinyiketela ka yena. Miehleketo na swikhongelo swa hina swi le ka
vandyangu wakwe, xikan’we na xiyenge xa mathekisi,” ku gimeta Phala, loyi a kombiseke leswaku a va nge yi emahlweni va burisana na vateki va mahungu hi mhaka leyi tanihileswi mhaka leyi yi nga le mavokweni ya maphorisa.

Swiviko swo kombisa leswaku Yolelo u baleseriwile a lova eka mhangu yo baleselana leyi yi koxeke vutomi bya vanhu va ntsevu kusuhi na rivala ra swihahampfhuka ra Mthatha exifundzheninkulu xa Kapa Vuxa hi vusiku bya 23 Khotavuxika 2025. Kasi emavhikini lamahundzeke, ku vile na timhangu to hlaya to baleselana exifundzheninkulu xa Kapa Vuxa laha ku nga dlawa na vanhu vo hlaya.