N’anga yo Dlaya yi tshika Matshalatshala ya Beyili
Hi Themba Chauke
N’anga ya Xintu yo ta yi huma hi le tiko-akelana ra Lesotho, naswona yo pfumala maphepha ya vutitivisi, Sebokoana Khounyana wa malembe ya 50, u tshikile matshalatshala yo endla xikombelo xa beyili eKhoto ya Majisitarata wa Vanderbijlpark. N’anga leyi yi langutanile na swihehlo swo kunguhata ku dlaya; ku tlhakisa n’wana wa malembe mambirhi Kutlwano Shalaba, xikan’we na ku tlula nawu wa vuhlapfa laha tikweni. Kasi manana wa n’wana Kuneuwe Portia Shalaba wa malembe ya 32, yena u langutanile na swihehlo swo kunguhata ku dlaya, ku tlhakisa, ku kunguhata ku phangha na ku nyika xitatimende xa mavunwa emaphoriseni.
Ku vuriwa leswaku hi siku ra 10 Hukuri 2024, manana wa n’wana u tekile n’wana wa yena wa nhwana a kombela leswaku n’anga yi dlaya n’wana loyi hikuva a nga tsakisiwi hi rimbewu ra n’wana, a vula leswaku u karhele ku swi tumbeta eka ndyangu wa ka vona leswaku n’wana loyi wanhwana. Kwalaho ku vuriwa leswaku wansati u dyisile
n’wana loyi xiganama. Endzhaku ka rifu ra n’wana loyi, va tekile ntsumbu wa n’wana va ya wu celela eka sirha leri nga entangiki eWaterpan.
Endzhaku ka vulavisisi bya maphorisa, ku 0vuye ku khomiwa n’anga leyi hi siku ra 29 Mudyaxihi 2025, laha a nga pfumela xikan’we na ku komba maphorisa laha n’wana a nga lahliwa kona, Endzhaku ko tivonakarisa nkarhinyana ekhoto, nandzu lowu wu hundziseriwile emahlweni ku ya eka siku ra 06 Mawuwani 2025 ku yisa emahlweni vulavisisi. Kasi enkarhini lowu hundzeke, manana wa n’wana na yena u tsoniwile beyili.
