Xiyimo xa Masipala xi Andlariwa
Hi Mkateko Ndlovu
Tanihi matirhelo ya timasipala, i mfanelo leswaku timasipala ti tshamela ro tivisa vaaki hi matirhelo ya tona. Hi siku ra ti 24 Khotavuxika 2025 Meyara wa masipala wa Collins chabane, Shadrack Maluleke u nyikile mbulavulo wa Xiyimo xa Masipala wa Collins Chabane xa lembe-ximali ra 2025/2026. Eka ntirho lowu a ku ri na swiyenge swo hambana-hambana swo fana na -varhangeri va xintu; vaaki ehansi ka Masipala lowu; mihlangano yo ka yi nga ri ya mfumo; Nhlangano wa Tihosi-CONTRALESA; mihlangano ya vafundhisi eka van’wana, ku ya twa mbulavulo wa Xiyimo xa Masipala wa Collins Chabane.
Eka mbulavulo wa yena, Meyara Maluleke u kombisile tiphurojeke leti humeleleke eka masipala to fana na- ku hoxiwa ka phevhumende eka switarata swa le ndzeni ka miganga; ku nghenisiwa ka gezi eka switandi leswintshwa; ku hakeleriwa ka timali ta swichudeni etiyunivhesithi; ku basisiwa ka swikweleti swa swichudeni etiyunivhesithi;
ku tumbuluxiwa ka mitirho na vuleteri; ku kuma ntokoto wa le ntirhweni eka lava thwaseleke na vantshwa hinkwavo lava faneleke; ntirhisano exikarhi ka masipala na COGHSTA ku nyika Tindlu ta ti-RDP; ku hlanganisiwa ka tindhawu ta le makaya na ntirhisano lowu yaka emahlweni na masipala wa xifundzantsongo xa Vhembe ku tiyisisa leswaku mitlhotlho ya mphakelo wa mati swa lulamisiwa.
Meyara u hlohloterile swiyenge swo hambana-hambana swa vaaki leswi welaka ehansi ka masipala lowu ku hoxa xandla ku vona leswaku masipala wa kula na ku tirha kahle ku yisa vukorhokeri eka vaaki. “Eka varhangeri va ka hina hinkwavo va Xintu; Mihlangano yo ka yi nga ri ya Mfumo; Mihlangano yo yimela Vaaki; Mihlangano yo yimela Vatirhi; vaaki; Vafundhisi na vatirhi va ka Masipala,
“a hi fanelanga ku languta endzhaku, a hi fanelanga ku pfumelela ku kokeriwa endzhaku, hi le ndleleni leyinene naswona nhlokomhaka ya hina a hi nchumu ehandle ka ku nyikiwa ka vukorhokeri eka vanhu va hina” Meyara wa hlamusela Meyara Maluleke u gimetile mbulavulo wa yena hi ku khensa varhangeri va Xintu na ku va hlohlotela ku ya emahlweni na ku vonaka eka timhaka ta vaaki leti lavaka ku lulamisa timhaka ta vukorhokeri lebyi fambelanaka na ku navela ka nhluvukiso wa masipala.
