Xifundzhankulu xi Nghenelela eka ku Jamelana ka Lepelle na Timasipala

Hi Themba Chauke

Mfumo wa xifundzhankulu xa Limpopo wu vula leswaku wu tinyiketerile eka ku ololoxa swiphiqo swo jamelana exikarhi ka timasipala to hlaya na Bodo ya Lepelle – Northern Water. Xiyimo lexi xi fikile laha xi nga kona hikokwalaho ka kuva Nkwama wa le Xikarhi wu tekile xiboho xo khoma mali leyi a yi fanele ku ya eka timasipala eka kotara leyi. Leswi swi ta endzhaku ka tihakelo leti kolotiwaka hi swifundzhantsongo swa Vhembe, Sekhukhune, Mopani xikan’we na masipala wa Lethaba eka vuphakeri bya mati.

Hi ku landzela mhaka leyi, Holobyenkulu wa xifundzhankulu xa Limpopo Dokodela Phophi Ramathuba u tekile goza hi ku sungula njhikajikisano na Ndzawulo ya Nkwama wa Xifundzhankulu, Ndzawulo ya Mfumo wa Nhlengelo, Vutshamo bya Vaaki na Timhaka ta Xinto, xikan’we na vuyimeri bya timasipala leti khumbhekaka na Bodo ya Lepelle-Northern Water. Holobyenkulu Ramathuba u vurile leswaku ku yimisiwa ka timali swi ta va na xiave xo biha swinene eka vaaki va xifundzhankulu xa Limpopo, ngopfu-ngopfu eka timasipala ta le Matikoxikaya ku fana na Lethaba, lowu wu pfumalaka swilo swo nghenisa mali ku wu fambisa. “leswi hi swona swi endlaka leswaku ku laveka ku nghenelela eka mhaka leyi xikan’we-kan’we, ku sivela switandzhaku swo tika hikokwalaho ka xiboho xa Nkwama wa le Xikarhi,” ku vula Holobyenkulu.

Hi nkarhi wa tihlengeletano, ku tshikeleriwile leswaku xiyimo xa swa timali xa timasipala swi rhangisiwa emahlweni eka xifundzhankulu xa Limpopo. Hikokwalaho ka leswi, xifundzhankulu xi tiyimiserile ku tisa xintshuxo mayelana na mikwetlembetano ya tihakelo xikan’we na ku landzelela mitwanano ya swa timali exikarhi ka timasipala na Bodo ya Mati.

Ku vuriwa leswaku leswaku ku pfumelelaniwile hi makungu ya mahakelelo xikan’we na ku sayina mitwanano ya vutihlamuleri leswi swi nga rhumeriwa eka Nkwama wa le Xikarhi, swi kombisa ku tinyiketela ka timasipala ku hakela swikweleti. “Hi tshembha leswaku ku nghenelela ka hina eka mhaka leyi swi ta tisa swintshuxo swo twala. Hi tshembha leswaku mhaka leyi yi ta va yi lulamisiwile, ku tiyisisa leswaku timasipala ti landzelela mitwanano leyi sayiniweke,” Holobyenkulu wa gimeta.