Masipala wu Tshambuluta Xandla hi Siku ra Mandela

Hi maendlelo ya matimba yo kombisa ntwelavusiwana na xindzhuti, Ndzawulo ya Nkunguhato na Nhluvukiso wa Ikhonomi ehansi ka masipala wa Tzaneen, hi ku rhangeriwa hi mufambisinkulu Benjamin Mathebula, a famba na mukhaselara Sophy Rakganya, va yisile ku kufumela, vuhlayiseki xikan’we na ntshembho eka ndyangu lowu pfumalaka hi siku ra Mandela.

Endzhaku ku kutwa hi mhaka ya mahlomulambilu ya Johannes Moyana, wanuna loyi a hanyaka na vutsoniwa, tatana wa vana va mune, xikan’we kokwana wa vatukulu va nkombo, loyi a sukeriweke hi nsati wakwe hikokwalaho ko xiyimo xa yena, masipala wa Tzaneen wu tekile goza ro pfuna ndyangu lowu. Ndyangu lowu a wu hanya emukhukwini wa mazinghi, na malapi naswona va pfumala na xihambukelo xa kahle.

Kasi hi siku leri, xiyimo xi cincile tanihileswi masipala wu nyikeleke hi yindlo xikan’we na vhanichara eka vandyangu wa tatana Moyana. Leswi swi nyikeriweke swi katsa. Swiphemu swa Mune swa Masofa, Mibedo yimbirhi, makhetenisi, Xigwitsirisi, xitafulana xa kofi, xitulu xa mavhilwa, tangi ra mati xikan’we na swakudya.

Masipala wu vula leswaku maendlelo lawa ya xixima ndzhaka ya Nelson Mandela, hi ku vuyisa xindzhuti, xikan’we na ku nyika kaya leri hlayisekeke, ra kahle eka ndyangu lowu hanyeke nkarhi wo leha eka xiyimo xo tika swinene.

Kasi hi hala tlhelo, xiyenge xa Gezi eka masipala wa Tzaneen, xi nyikerile hi mathangi ya mati emugangeni wa Lerejeni ehansi ka hosi Joe Mahasha eka wadi 11. Hi ku rhangeriwa hi mufambisinkulu wa ndzawulo leyi Freedom Mthwethwa, xikan’we na Mutshamaxitulu wa Mitlangu, Vutshina na Ndzhavuko mukhaselara Renny Mabuza, xipano xi hoxile mathangi mambirhi ya 10 000 wa tilitara, leswi ku vuriwaka leswaku swi tisile xintshuxo eka xiphiqo xa mati emugangeni wa Lerejeni.

Masipala wu vula leswaku hi pfhumba leri, vaaki va muganga wa Lerejeni sweswi va kota ku fikelela mati yo tenga hi ku olova, leswi ku nga xilaveko xa mani na mani na nyiko ya matimba. “Ku nyikela loku a hi ku xixima ndzhaka ya Nelson Mandlela ntsena, kambe swi tlhela swi tiyisisa leswaku muganga wa vuyeriwa hi vuphakeri lebyi antswisiweke bya mati xikan’we na ndhawu yo hlayisa mati ku ringana malembe yo hlaya.”