Muntshwa a Simeka Nhlangano wo Pfuna Vaaki.
Muntshwa a Simeka Nhlangano wo Pfuna Vaaki.
Hi Themba Chauke
Ntokoto Mathebula u velekiwile hi lembe ra 2001, emugangeni wa ka Ndhambi ehansi ka vukosi bya ka Dzumeri eka Mabunda. Jaha leri ri tumbuluxile nhlangano, lowu ri wu kongomiseke eka ku pfuna vaaki. Nhlangano lowu tumbuluxiweke hi lembe ra 2020 ehansi ka vito ra Mandlakhazi Campaign vito leri ri tirheke malembe mambirhi, laha nhlangano a wu nyikela hi switirhisiwa swo hambana-hambana, naswona Ntokoto a tirha na Talent Mulondzo wo wuma emugangeni wa ka Mbhendle.
Lavambirhi a va famba va nyikela vanhu swilo swo hambana-hambana leswi swi katsaka tijinifomo na switirhisiwa swa vaxisati. “Hi fambile tikereke to hlaya swinene ku katsa na yinwani ya tikereke eka Malamulele. A hi nga fambi hi ri hexe, a hi famba na va Tivanani Funeral Service lava a va hi pfuna ku humelerisa leswi a hi lava ku swi fikelela. Hi kotile ku nyikela vana va ka Malamulele emugangeni wa ka Mahonisi hi swtirhisiwa na switifikheti swo va hlohlotela,” Ntokoto wa hlamusela
Ntokoto u kombisile leswaku va kotile ku nyikela 206 wa vana hi switirhisiwa, laha va nga tlhela va ya eka kereke ya ka Ndhambhi ku ya nyikela hi ku tirhisana na va Tirhani Security Services, laha va nga nyikela swilo swo fana na swakudya, mugayo xikan’we na switirhisiwa swa vaxisati, laha va hlumuselaka leswaku va kotile ku nyikela vana vo hlaya swinene.
“Hi lembe ra 2022 ndzi vile na miehleketo yo cinca vito ra nhlangano lowu ndzi wu vitana hi vito ra mina ku nga Ntokoto Foundation. Endzhaku ka ku cinca vito swi ndzi vekile ekule ngopfu laha ndzi nga sungula ku endla mitlangu ya vavasati emugangeni wa ka Matsotsosela ndzi seketeriwa hi va Tirhani Security,” ku vula Ntokoto. U yile emahlweni a vula leswaku u hlanganile na yona mitlhotlho yo kayivela macheleni yo yisa migingiriko ya yena emahlweni, tanihileswi vaseketeri vakwe va Tirhani Security Services, a va kumekaka exilungwini.
Ntokoto a nga tshamanga hi mavoko, kambe u yile emahlweni a lava mpfuno laha a nga ya hlangana na va Mhlangaveza Family Assurance, leswi swi nga endla leswaku a yisa emahlweni timhaka ta mitlangu ya bolo ya milenge hi ku seketeriwa hi va Mhlangaveza Family Assurance. “Ndzi kotile ku endla mitlangu yo ringana mune emigangeni yo hambana-hambana.,” u ya emahlweni. “ndzi kotile ku nyikela xikolo xa Nyumbani hi switifikheti swo hlohlotela eka vadyondzi va giredi 12 , ndzi tlhela ndzi nyikela xikolo xa ka Dzumeri hi switifikheti swo hlohloteka eka vana va giredi 7.”
Hi ku tirhisana na va Mahlangaveza, u kotile ku vitaniwa na le ka swiyanimoya, ku katsa na ku famba tindhawu to hambana-hambana laha tikweni laha a ya dyondza matirhelo xikan’we na ku kombiwa swilo swo hamba-hambana, eBloemfontein. Hi ku tirhisana na maphorisa, u tlherile a va na nkateko wo endzela mapurasi yo hambana-hambana etindhawini ta ka Dzumeri. U tlherile a ya exilungwini ku ya tirha eka khamphani leyi a yi n’wi seketela, laha a tlheleke a teka xiphemu xa muholo wakwe ku ya emahlweni a pfuna vanhu.
Ntokoto u hlohloteriwile hi vanhu vo hambana-hambana lava va katsaka nhloko ya xikolo xa le hansi xa ka Dzumeri. U tlhela a kombisa leswaku ripfumelo ra yena eka timhaka ta vukhongeri ri n’wi pfunile swinene, laha a vulaka leswaku u vonile matimba ya Xikwembu endzhaku ka ku endzela kereke leyi rhangeriwaka hi ST Paut Hagiazo ya Harvest Ministry. “Tindlela ta mina ti vuye ti pfuleka swinene, laha vanhu a va ndzi lava henhla na le hansi. Kasi ndzi kotile na ku nghenelela eka mphikizano wa vanhu va 367, laha ndzi nga kuma xiyimo xa vumbirhi,” ku vula Ntokoto, loyi a kombiseke leswaku u khensa a vuyelela eka va Mhlangaveza Family Assurance lava va nga vona vuswikoti bya yena kutani va tinyiketela ku n’wi pfuna. Lava va lavaka ku pfuna Ntokoto eka rendzo rakwe, va nga n’wi kuma eka riqingo ra 078 306 0300.