Timovha ta Ford ti Susiwa Epatwini
Hi Themba Chauke
Va National Consumer Commission, (NCC) va tivisa vaaki hi ku susiwa epatwini ka ti movha ta ka Ford, leti katsaka Ford Ranger, Everest, EcoSport na Puma, tanihilaha swi tivisiweke hi va khamphani ya Ford eAfrika-Dzonga.
Ti Ford Ranger na Everest leti susiweke epatwini hi leti ti endliweke exikarhi ka lembe ra 2022 khotavuxika ku fika Nyenyankulu 2025. Kasi ti Ford Ranger na ti Everset leti susiweke epatwini i ti Wildtrak na Platinum leti hoxiweke njhini ya 3.0L Lion. Timovha leti ti vuriwa leswaku ti na swihoxo swikulu laha ku vuriwaka leswaku xiporokete xa camshaft ya le ximatsini eka njhini xi nga ha tshoveka, leswi swi nga endlaka leswaku njhini yi yima swa xitshuketana leswi swi nga na nxungeto wo endla nghozi hikokwalaho ka ku heleriwa hi matimba loko yi ri ku fambeni.
Kasi ti-Ford Puma leti khumbhekaka hi leti ti endliweke exikarhi ka n’hweti ya Hukuri 2021 ku fika Ndzhati 2024. Eka timovha leti ta Puma, phayiphi ya mafurha yi nga ha gudla nsimbhi yo seketela thangi, leswi swi nga endlaka leswaku ku onhaka ntila wa mafurha. Leswi swi nga endla leswaku hi ku famba ka nkarhi ku pfuta phayiphi ya mafurha, leswi swi nga endlaka leswaku njhini yi heleriwa hi matimba, kumbe loko ko va na nchumu wo lumeka ndzilo, swi nga ha endla leswaku ku va na ndzilo. Ku vuriwa leswaku vinyi va timovha leti va nga ha twa nkahelo wa mafurha, lama pfutaka hi le hansi ka movha, kumbe musi lowu humaka eka ndhawu yo hisa ya movha.
Loko ku ri ti-Ford Ecosport hi leti ti endliweke exikarhi ka lembe ra 2021 ku fika 2022 leti ti tirhisaka 6F 15 Automatic. Eka timovha leti khumbhekaka, ku vuriwa leswaku half shaft ya le mahlweni swa endleka yi nga hoxiwanga yi fika emakumu, leswi swi nga endlaka leswaku yi nga tirhi hi ku hetiseka.Leswi swi nga endla leswaku njhini yi lahlekeriwa hi matimba loko yi ri ku fambeni. Kasi loko movha leyi yo hoxiwa eka gerhe yo paka munhu a nga kokanga tiburiki to paka, movha wu nga ha ntlhetlha swi nga languteriwanga. Leswi swi nga endla nghozi.
Mukhomixinara wa NCC wo khomela, Hardin Ratshisusu, u vule leswaku hikokwalaho ka swihoxo leswi swi paluxiweke swa timovha leti, vanhu lava va nga na timovha leti va komberiwa ku tihlanganisa na vaxavisi va timovha ta ka Ford leti lava va nga le kusuhi na vona leswaku ti ta kambisisiwa, leswaku ti ta lunghisiwa ehandle ka tihakelo