Mudzaberi a Tlakusa Xipano ku ya Ehenhla

Themba Chauke

Mudzaberi Timmy Mashele u leterile xipano xa Phalaborwa United ku kondza xi tlakusiwa xi ya tlanga eka Ligi ya ABC Motsepe. Rendzo ra Mashelele ri sungurile loko a ta va a tlangile bolo exikarhi ka nsava ra muganga wa ka Xikukwani. Mashele u kotile ku fika laha a nga fika kona hikwalaho ka rirhandzu, ku tiyisela na nseketelo wa vaaki.

Hi lembe ra 1986, malume wa Mashele u tumbuluxile xipano xa bolo ya milenge lexi tivekaka hi vito ra Wilson Express FC eka Xikukwani. Mashele u kulerile emugangeni wa ka vakokwana wa yena laha xipano xa malume wa yena a xi simekiwile kona. Xipano xa Wilson FC xi tlangile xiphemu lexikulu eku hlohloteleni ka Mashele leswaku a va na milorho leyinene. Endzhaku ka sweswo, u nghenelerile ntlango wa bolo na vanakulorhi va yena.

Mashele u sungurile xipano xa yena hi ku landzelela mikondzo ya malume wa yena. A tshamela ra ku tiolola na vatlangi va Wilson Express FC tanihi n’watipala, hambileswi malembe ya yena a ma nga se fikelela. “Ndzi kotile ku vona leswaku ndzi na vuswikoti bya ku rhangela hikokwalaho ka ntlango wa boloya milenge”, ku vula Mashele.

Mashele u tlakusiwile leswaku a tlangela xipano xa Wilson Express FC ehenhla ka vuleteri bya khale ka mudzaberi David Oupa Zitha. U sungurile ku tlanga nava Patrick Mabasa na Foster Chippa Mathebula. Ndzima leyi yi pfurile tindlela ta vudzaberi bya yena.

Hi lembe ra 2003, a ri mutlangi a tlhela a va mudzaberi wa xipano xa Xikukwani Young Fighters FC. Ntirho wa yena wa vudzaberi wu ndlandlamukile hi lembe ra 2007, loko a ta va mudzaberi wa xipano xa Xikukwani Madrid FC. Xipano lexi a xi seketeriwa hi khale ka varhangeri va Giyani United, ku nga Mhani Mercy Ndhambhi na Zecks Mashimbyi.

Ku pfuleka ka vudzaberi bya Mashele ku vile kona hi nguva ya 2016/17, loko a kota ku fikisa xipano xa Wilson Express FC eka mphikizano wa ku tlakusiwa. Hambiloko xipano xa Wilson FC a xi nga kotanga ku tlakusiwa, rendzo ra Mashele a ri yimanga. U engetile a fikelela eka mphikizano wa ntlakuso na xipano xa Shivulani Dangerous Tigers FC hi nguva ya 2020/21, kambe swi tsanzile ku hundzela emahlweni ku ya eka Ligi ya ABC Motsepe.

Hi nguva ya 2021/2022, u fikelerile xiyimo xa vumune na xipano Giyani Happy Boys FC aka mphikizano wa ABC Motsepe Foundation. Hambiswiritano, u kotile ku fikelela xiyimo xa vumbirhi hi nguva ya 2022/2023. Leswi swi tiyisisile xiyimo xa yena tanihi mudzaberi wa vuswikoti.

Mashele u yisile emahlweni vudzaberi bya yena na xipano xa Phalaborwa United endzhaku ka loko nkarhi wa yena na Giyani Happy Boys FC wu fikile emakumu. Phalaborwa United FC a yi tlanga eka liga yale hansi hi nkarhi walowo. U leterile xipano xa Phalaborwa United ku kondza xi tlakuseriwa ku ya eka ABC Motsepe Foundation hi nguva ya 2024/25.

Xipano xa Phalaborwa United FC xi kotile ku tikisa voko eka mphikizano wa Mopani Hollywoodbets Regional League (Marula Stream), ehansi ka vudzaberi bya Mashele. Va kotile ku tlanga mitlangu yo ringana 30, laha vanga hlula eka mitlangu ya 29, Kutani va tlanga ku ringana eka ntlango wun’we. Tikiselo ra vona ra xandla ri kotile ku hundzela na le ka mphikizano wa ntlakuso, laha va nga kota ku hlula mitlangu hinkwayo va nga hluriwanga na hi xipano na xin’we.

Ku tinyiketela ka Mashele eka vudzaberi bya yena swi kombisa leswaku u tiyimiserile ku fikelela emaninginingini ya ku rhangela xipano xa xiyimo xa le henhla eka rin’wana ra masiku. Ehenhla ka swilo hinkwaswo, u tata ku khensa nseketelo na rirhandzu leri vanhu va n’wi kombeke rona eka rendzo ra yena. “Ndzi khensa rirhandzu na nseketelo wa vanhu kusuka eka matlhelo hinkwawo ya timheho ta misava. Swi kala ngopfu ku kuma nseketelo wa vanhu wa muxaka lowu, kambe eka mina swi hambanile”.

“Ndzi khensa un’wana na un’wana loyi a tshembhelaka eka mina, a tlhela a ndzi seketela. Ndzi tlhela ndzi khensa khale ka muleteri wa mina, tatana Gezani Mashaba, loyi a ndzi hlohloteleke ku suka ehansi. A tshamela ra ku ndzi tsundzuxa leswaku “loko u titshembha, u ta tisa ku cinca eka tiko ra hina hikokwalaho ka ntlango wa bolo”. Mashele u boxa leswaku marito lawa ku vile nhlohlotelo eka yena.