Mukhaselara a landza MEC

Themba Chauke

Hi ku lwela migingiriko ya phurojeke leyi yi nga yima, mukhaselara wa wadi 28, leyi yi katsaka miganga ya Mphakane na Zava, mukhaselara Tiyani Rabothata u tekile varhumiwa va vaaki ku ya ePolokwane ku ya hlangana na MEC wa Ndzawulo ya Mitirho ya Vaaki, Magondzo na Vumaki, Tonny Rachoene

Xikongomelo xa nhlengeletano leyi a ku ri ku yisa xikombelo lexi nga va kona khale xo antswisa ngondzo ra D3844 kusuka eka girawulu ku ya eka xikontiri. Gondzo leri ri suka emugangeni wa Mphakane ku ya ePhalaborwa ri hundza hi le ka Zava, Xitlakati na le Selwane.

Eka lava a va ri kona va katsa Ndhuna ya muganga wa ka Mphakani Piet Malatjie na huvo yakwe, ku katsa na vayimeri va van’wamabindzu va le migangeni, lava va kombiseke ku hlundzuka ka vaaki hi ku hlwerisiwa ka phurojeke leyi.

Rabothata u hlamuserile leswaku ku kunguhatiwa ka gondzo leri ra D3844 swi herile khale kusukela hi lembe ra 2008, naswona ku endliwa ka gondzo leri a swi se sugula ku fika sweswi. “Hi lembe ra 2025, khale ka holobyenkulu wa xifundzhankulu xa Limpopo Stan Mathabatha u tinyiketerile emahlweni ka vaaki etindhawini ta ka hina a vula leswaku u ta yisa emahlweni migingiriko ya gondzo leri. Kambe a ku na nhlanga leyi yi nga baleka ngati,” ku vula Rabothata.

U tlherile a kombisa swivilelo swa leswaku ku na tiphurojeke tintshwa leti ti rhangisiwaka emahlweni ka phurojeke ya D3844, hambileswi makungu a ya kombisa leswaku ku fanele ku rhangisiwa phurojeke leyi. “swivilelo swa hina hi leswaku tiphurojeke tintshwa to fana na gondzo ra D3187 kusuka  eka Mageva ku ya eka Makhuva, xikan’we na gondzo ra D3810 kusuka eka Thomo ku ya eka Hlomela, leti enkarhini wa sweswi ti nga le ku endliweni, hambileswi gondzo leri ri kunguhatiweke ku sungula,” u ya emahlweni. “Hi twa ingaku hofisi ya MEC a yi fanele yi kombisile leswaku ku fanele ku rhangisiwa tiphurojeke leti ti kunguhatiweke khlale. Hambiswiritano, nhlengeletano ya hina na MEC yi tikomba yi ta tswala mihandzu.”

Ku ya hi mukhaselara, MEC u amukerile swivilelo swa vona, kambe a kombisa leswaku xikombelo xa vaaki a xi nge endleki eka lembeximali leri, hikuva ndzawulo se yi tinyiketerile eka tin’wana tiphurojeke ta mapatu, naswona u va byerile leswaku va yima ku kondza ku fika lembeximali leri taka.

“U tlherile a kombisa leswaku hi fanele ku tlhela hi kambisisa loko gondzo ra vona ri kombisa loko ri wela eka tiphurojeke leti ti rhangisiwaka emahlweni eka masipala wa vona. Kambe loko h ikambisisa, hi kumile leswaku gondzo ra hina ri le ka xiyimo xa vukhume, leswi swi nga amukelekiki eka hina. Hi ta ta kondletela leswaku gondzo ra hina ri rhangisiwa emahlweni ku ya eka xiyimo xo sungula, leswaku ri ta tekeriwa enhlokweni loko mali yi kumeka,” wa ha hlamusela.

Rabothata u tibohile leswaku u ta ya emahlweni a njhekanjhekisana na mfumo ku kondza a fikelela leswaku gondzo ra D3844 ri endliwa. Loko a vutisiwa leswaku xana va ta endla yini loko MEC a tsandzeka ku fikelela switshembhiso swa yena, Rabothata u arile ku nghenisiwa eka ku ehleketelela.