Wanhwana a Dlawa

Hi Pilot Manganyi

Ku kumekile ntsumbu wa ntombhi ya malembe ya 18 eMvudi Park, ehandlenyana ka doroba ra Thohoyandou. Ntsumbu wu kumekile wu papamarile enambyeni wa Muledane. Mhango leyi yi siyile vaaki va chavile naswona va twa vutomi bya vona byi nga hlayisekanga.

Maphorisa ya boxa leswaku ntsumbu lowu wu nga kumeka hi Mugqivela, 20 Ndzhati 2025, hi awara ya 15:30 wu vonaka ku ri wa n’wana loyi a tivekaka hi mavito ya Mulisa Rumangi. Ntsumbu wu kumekile wu nga ambarisiwanga swiambalo, milenge na mavoko swi bohiwile, na saka ra 5kg leri a ri cheriwile maribye ri bohiwa emilengeni. Ku pfumeriwa leswaku a bohiwile saka ra maribye leswaku a ta kota ku mbombomela.

Muvulavuleri wa maphorisa Colonel Malesela Ledwaba u boxile leswaku ntsumbu a wu ri kusuhi na ku bola. “Vulavisisi byi kombisa leswaku swirho swin’wana swa mirhi wa yena swa kayivela, naswona a ri na timbanga emilegeni”, ku Boxa Ledwaba.

Ku kumeka ka ntsumbu lowu swi endlile leswaki vaaki va doroba ra Thohoyandou va pfumela leswaku vanhu va dlayiwa hikokwalaho ka magandzelo. Vaaki va boxile leswaku rifu leri i “tihanyi na mbilu ya lunya”, va tlhela va kombela maphorisa leswaku va tirha hi matimba ku tisa vululami eka vandyangu wa mufi.

Va ndyangu va boxile leswaku Rumanangi u nyamalarile endzhaku ka loko a tava a endzerile Royal Heritage Festival ya lembe na lembe. Maphorisa va tivisiwile hi ku nyamalala ka yena, laha va nga tlhela va kota ku tiyisisa leswaku i ntsumbu wa yena hi nkambisiso wa DNA endzhaku ka loko a kumekile a lovile.

Maphorisa va mangarile nandzu wa  ku dlayiwa ka Rumanangi, naswona vulavisisi byiya emahlweni. Va xinawu va tlherile va kombela leswaku loyi a nga na vuxokoxoko lebyi khumbhanaka na ku nyamalala ka Rumanangi a khumbha xitichi xa maphorisa, kumbe ku khumbha SAPS Crime Stop line eka 08600 10111.