Pfhumba ra ku Hlatswa Swicelwa

HI Pilot Manganyi

Mfumo wa xifundzhankulu xa Limpopo wu vula leswaku wu tiyimiserile ku tiyisisa pfhumba ra ku endla leswaku swicelwa swi mbisi swi nga ha humi exifundzheninkulu xa Limpopo ku ya hlutiwa kun’wana. Mfumo wa Limpopo wu languterile ku ndlandlamuxa ikhonomi ya vaaki va Limpopo hi ku tumbuluxa mitirho hikokwalaho ka ku hlatswa swicelwa swi mbisi etindhawini leti faneleke ta Limpopo. Nhloko ya Ndzawulo ya Nhluvukiso wa Ikhonomi, Mbango na Vupfhumba eka Xifundzhankulu xa Limpopo (LEDET), Matodzi Rathumbu u tiyisisile marhungula lawa eka nhlengeletano na vahangalasi va mahungu lowu a wu khomeriwile eholweni ya Hodela ya Polokwane Atrium Boutique.

Rathumbu u kombisiwe rifuwo ra xifundzhankulu xa Limpopo hi tlhelo ra swicelwa swa nkoka, ku katsa swicelwa swo endla tisimbhi, leswi ku nga swin’wana swa swicelwa swa nkoka. “Vaaki va karhele hi hina kuva hi vulavula hi swicelwa swa xifundzhankulu xa hina. Sweswi hi langutanile na pfhumba ra ku hlatswa swicelwa na ku tumbuluxa tisimbhi na swin’wana hikokwalaho ka swona”, ku boxa Rathumbu.

Rathumbu u kombisile ndhawu yo hlawuleka ya Ikhonomi yo fana na Musina-Makhado tanihi tindhawu leti ti ringaneleke ku sungula pfhumbha leri. “Hi languterile ku tirhisa swicelwa leswi endlaka tisimbhi na malahla ku tumbuluxa tisimbhi na switirhisiwa swin’wana”, ku vika Rathumbu.

Muvulavuleri wa LEDET u tlherile a boxa leswaku mfumo wu kunguhatile ku endla leswaku xifundzhankulu xa Limpopo leswaku xi va kaya ra ku hlatswa swicelwa na ku tumbuluxa switirhisiwa hi swona. “Ku hlatswa na ku tumbuluxa switirhisiwa hi swicelwa swa hina hi yona ndlela leyi hi nga ta yi tirhisa ku ndlandlamuka hi suka eka ku rhumela swicelwa swi ya etindhawini tin’wana. Goza leri ri ta tisa ku cinca hi tlhelo ra ikhonomi na ku tumbuluxa mitirho”, ku engeta Rathumbu.

Rathumbu u tiyisisile a kombisa leswaku goza leri hi rin’wana leri ri nga ta tisa ku cinca eka ndlandlamuko wa ikhonomi ya xifundzhankulu xa Limpopo. Xikungu lexi xi ta endla leswaku xifundzhankulu xa Limpopo xi tirhisa swicelwa swa xona ku ndlandlamuka hi tindlela to hlaya.