Vaaki Va Vilerisiwa hi Matirhelo ya Tliliniki yo Hlakala.
Vaaki va le mugangeni wa le Valdezia va kombela mfumo kuva wu va akela tliliniki yintshwa,
hikokwalaho ka leswi tliliniki ya khale yi nga na maiko yo hlakala, vaaki va kombisa leswaku miako leyi a
ku ri maiko ya nkarhinyana leyi a yi endliwile hi timesinari hi lembe ra 1986.
Vaaki va kombisa leswaku i khale va yimerile mfumo kusukela na hi nkarhi lowu mfumo a wu ri ehansi ka
vurhangeri bya khale ka phuresidende ya tiko Jacop Zuma, laha va kombiseke leswaku va khomile
vumbhoni hinkwabya lebyi kombisaka leswaku i khale vayimerile ku akeriwa tliliniki. Va kombisa leswaku tanihileswi va nga va vhoti va koxa leswaku mfumo wu va nyika leswi faneleke.
Vaaki va kombisa leswaku hambileswi swi nga na kwalomu ka 30 wa malembe hi ri eka xidemokirasi,
vona tanihi vaaki kuhava nchumu wo khomeka emugangeni wa Valdezia.Vaaki va kombisa ku ka va nga tsakisiwi na hi matirhelo ya tliliniki hikokwalaho ka leswi matirhelo ya nga ncica ka leswi a ku tirhisiwa xiswona swa masiku hinkwawo ya vhiki.
Va kombisa leswaku matirhelo yancicile swinene endzaku ka loko vaongori va 11 lava a va tirhia va susiwile kasi van’wana vaya ephexenini, loko van’wana va tshikile ntirho kambe swivandla swa vona swi nga siviwi. Va kombisile leswaku hambi vatirhi lava a va vona leswaku tliliniki na vona a va siviwanga endzaku kaku ya eku wiseni.Va thlele va kombisa leswaku tliliniki yi ncincile matirhelo yo nghena na ku huma entirhweni ka vaongori eka masiku ya vhiki.
Va kombisile leswaku vaongori va tirha kusukela hi awara ya nkombo na mpundzu ku fikela awara ya 4 na hlikanhi, na kona ka hari hava vatirhi lava va pfunaka vavabyi endzhaku ka tiawara leti, leswi swi vulaka leswaku muvabyi u fanele ku laveriwa movha lowu wu koxaka mintsengo ya le henhla ya ku fika kwalomu ka R800 loko va fanele ku yisiwa exibedlele na vusiku.
Va kombisa leswaku vanhu vo hlaya va lahlekeriwa hi vutomi hikokwalaho ka matirhelo lawa. Vaaki va kombisa leswaku va karhele na kona se swi enerile ku xaniseka ka vona.
