KU SUSIWA KA MABINDZU KU TA BASISA DOROBA RA GIYANI

Hi Themba Chauke

Masipala wa Giyani wu ta sungula migingiriko yo susa miako ya mabindzu yo ka ya nga ri enawini edorobeni ra Giyani, endzhaku ka ku tiyisisiwa leswaku Nawu wa PIE (Prevention of Illegal Eviction Act) wu kongomisiwa ntsena eka ku hlongoriwa ka vatshami etindhawini ta vutshamo, ku nga ri eka mabindzu.

Mutshamaxitulu wa Komiti ya Vuhleri bya Tikota, Kenneth Mhlongo, u hlamusele leswaku masipala wu nga tirhisa nawu wa mani na mani loko wu kumile xileriso xa khoto. “Ku susiwa ka mabindzu yo ka ya nga ri enawini hi hlwerisiwa hi ku langutela mpfumelelo wa khoto. Nawu wa PIE wu tirha ntsena eka vatshami, ku nga ri eka mabindzu,” ku vula Mhlongo.

Mukhaselara Cedrick Baloyi, loyi a nga muyimeri wa xinawu hi ntirho, u seketerile mavonelo lawa. “A swi bohi ku tirhisa Nawu wa PIE loko hi susa mabindzu. Loko hi endla mhaka leyi hi xihatla, hi ta antswisa xivumbeko xa doroba,” ku vula Baloyi.

Ku ya hi Baloyi, loko ku hlongoriwa munhu emutini, u fanele ku nyikiwa ndhawu yin’wana ya vutshamo, kambe a swi tano eka mabindzu. Leswi swi vula leswaku bindzu ri nga susiwa loko ntwanano wo hira wu herile na ku landzelerisa maendlelo ya khoto.

Mhlongo u tlherile a tiyisisa leswaku masipala wu yimerile mpfumelelo wa khoto ku sungula ntirho lowu. Loko mpfumelelo wu nyikiwa, miako yo hlaya ya mabindzu yo ka ya nga ri enawini yi ta susiwa, leswi swi ta pfuna ku basisa doroba, ku antswisa vuhlayiseki na ku hlohlotela van’wamabindzu ku tirhisa tiphomende ta xinawu.

Kasi magoza lawa ma languteriwa ku endla leswaku doroba ra Giyani ri koka rinoko eka vavekisi. Leswi swi fambisana ni marito lama meyara wa Giyani, Thandi Zitha, a nga tshama a ma vula hi nkarhi wa mapfhumba yo basisa, laha a tiyiseke leswaku ku susiwa ka mabindzu yo ka ya nga ri enawini ku ta pfuna ku tumbuluxa mitirho eka vatshami va le Giyani.