MAVALANI YI KUMA GONDZO LERINTSHWA RA MITLANGU

Hi Themba Chauke

Masipala wa Giyani wu hetisile ku aka ndhawu ya mitlangu yo hambana-hambana ya vaaki emugangeni wa ka Mavalani. Ndhawu leyi ya manguvalawa yi dyile R25,1 wa timiliyoni ta tirhandi, leswi swi kombisa ntirho wa nkoka lowu masipala wu wu endleke eka matshalatshala ya ku antswisa vumaki na ku tumbuluxa vuhangaselo bya vantshwa.

Muvulavuleri wa masipala, Steve Mavunda, u hlamusele leswaku phurojeke leyi yi kombisa ku tinyiketela ka masipala eka ku tlakusa nhluvukiso wo twala. “Ndhawu leyi yintshwa ya mitlangu yi yimile tanihi xikombiso xo khomeka xa ku tinyiketela loku, leswi swi endleriweke ku nyika vaaki, ngopfu-ngopfu vantshwa, ndhawu ya manguvalawa ku nghenela eka migingiriko ya mitlangu,” ku vula Mavunda.

U tlhele a vula leswaku ndhawu leyi yi languteriwa ku hlohlotela mahanyelo ya rihanyo lerinene, ku kurisa vuswikoti bya mitlangu, xikan’we na ku kondletela ku hluvukisa vantshwa etindhawini ta masipala wa Giyani. Ku gimetiwa ka ndhawu leyi ku landzela tiphurojeke to hlaya ta masipala, ku katsa ku tlakusiwa ka mapatu emalokixini yo hambana-hambana ya Giyani ku fana na le ti-A, ti-F, ti-E, D1, D2 xikan’we na le Kremetart.

Ku ya hi Mavunda, ndhawu leyi a ku ri yin’wana ya tiphurojeke ta nkoka leti masipala wu ti rhangiseke emahlweni, naswona yi hetisisiwile hi ku nyikeriwa eka masipala hi mukondirakitara. Ku nyikeriwa ximfumo ka ndhawu leyi swi languteriwa ku endliwa hi 21 Hukuri 2025, hi nkarhi wa Imbizo ya meyara.

Ndhawu leyintshwa yi ta katsa mitlangu ya mune – ku nga tennis, volleyball, netball na basketball – leswi a swi nga fikeleleki emugangeni kambe a swi kumeka ntsena emadorobeni. “Timbala leti to hlaya ta mitlangu swi ta pfuna vaaki ku nghenela eka mitlangu yo hambana-hambana, xikan’we na ku nyika vantshwa nkateko wo humesela ehandle na ku kurisa vuswikoti bya vona laha va tshamaka kona,” ku engetela Mavunda.

U tlherile a kombisa leswaku ndhawu leyi yi nga ha tirhisiwa na ku endla migingiriko yo hambana-hambana emugangeni, ku katsa tihlengeletano ta vaaki na migingiriko ya vutshila. “Ndhawu leyi a hi ya mitlangu ntsena, kambe na ndhawu yo hlanganisa vanhu,” ku vula yena.

Mavunda u gimete hi ku vula leswaku masipala wu tinyiketerile ku hlayisa ndhawu leyi xikan’we na ku tiyisisa leswaku yi vuyerisa vaaki na le ka malembe lama taka. “Ku gimetiwa ka ndhawu leyi ya mitlangu i xikombiso xa leswaku masipala wa Giyani wu na xivono xo tisa ku cinca etindhawini ta vaaki hi nhluvukiso wo hlayiseka lowu wu katsaka na vanhu exikarhi.”

Ends