XIFANISO YI HLULA EKA THONAMETE

Hi Themba Chauke

Xipano xa bolo ya milenge xa Xifaniso xi havaxeriwile xidlodlo xa vahluri endzhaku ka ku hlula hi 2-1 hi tiphenati ehenhla ka xipano xa Hatshama Bucs Eleven, eka thonamete ya swipano swa nhungu leyi a yi tika swinene leyi a yi khomeriwile erivaleni ra mitlangu ra ka Xikukwani.

Ku hlula loku ku endlile leswaku xipano xa Xifaniso xi tibukutela sagwati ra mali ya ntsengo wa R10 000, loko Hatshama Bucs, yi tikumerile R3 000 tanihi hi vahluriwa eka ntlango wo hetelela. Ntirho lowu wu tlangiweke masiku mambirhi, a wu ngheneleriwile hi swipano swa nhungu swa le ndhawini liya, leswi a swi tshwimbirisana hi ku lava xidlodlo.

Eka mitlango yo sungula, mphikizano a wu hisa, laha swipano a swi kombisa vuswikoti na ku tinyiketela tanihileswi a swi lava ku fikelela xiyimo eka ntlango wo hetelela. Hi siku leri ri landzelaka, a ku lo sala ntsena xipano xa Xifaniso na Hatshama Bucks Eleven, leswi swi tekeke swivandla swo lwela xidlodlo.

Xipano xa Xifaniso xi sungurile ntlango hi ku rhanga emahlweni hi golo yin’we endzhaku ka ku howisa hi timinete timbirhi ntlango wu sungurile leswi swi endleke leswaku ntshungu wu ba huwa hi ku tsaka. Va tlangile swinene ku tlula xipano lexi a va tlanga na xona eka xiphemu xo sungula, laha va nga howisa golo ya vumbirhi endzhaku ka timinete ta 15 ntlango wu sungurile.

Ehandle ka matshalatshala ya swipano leswi swimbirhi, a ka ha howisiwanga tin’wana tigolo eka xiphemu xo sungula, leswi swi endleke leswaku xipano xa Xifaniso xi ya ekuwiseni xi rhangile emahlweni hi tigolo timbirhi eka tandza. Kambe loko ku vuyiwa eka xiphemu xa vumbirhi, se a ku jika matafula.

Xipano xa Hatshama xi vuyile eka xiphemu xa vumbirhi bya tinyoxi leti ntlhotlhiweke, xi nga fani na le ka xiphemu xo sungula. Xi hlaserile vatlangi va le ndzhaku va Xifaniso laha a xi copa tibolo etipaleni ta Xifaniso bya miseve.

A swi tekanga nkarhi laha xi nga kota ku howisa eka rhengu ra vumbirhi ntlango wu ri exikarhi. Leswi swi tisile ntshembho eka xipano xa Hatshama. Ntshikelelo ehenhla ka Xifaniso wu yile emahlweni, naswona loko ka ha sale timinete ta mune ntlango wu nga se fika emakumu, xipano xa Hatshama xi howisile golo yo ringanisa leswi swi endleke leswaku vaseketeri va tlangela hi ndlela ya xiyimo xa le henhla.

Ntlango wu fikile emakumu hi 2-2, naswona vahluri a va fanele ku ahluriwa hi tiphenati. Swipano hinkwaswo a swi kombisa ku tinyiketela, kambe i xipano xa Xifaniso lexi xi tirheke kahle lava va howiseke tiphenati timbirhi ku hlula hi mbhovo wa nayiti hi 2-1.

Ku hlula loku ku tisile ku tlangela exikarhi ka vatlangi va Xifaniso na vaseketeri va xipano, lava va tateke rivala hi ku tsaka. Eka Hatshama a ku sarile kantsongo ku fika eKanana. Hambiswiritano, matlangelo ya vona eka thonamete leyi ya kokile rinoko eka vaseketeri na swipano swin’wana.

Kasi mukondleteri wa ntirho lowu Kenneth Malungani u hlamuserile thonamete leyi tanihi leyi yi humeleleke, laha a kombiseke nseketelo wa le henhla wa vahlaleri lava va kondzeleleke maxelo yo titimela ku ta hlalela mitlangu leyi. “A ku ri mphikizano wo tika kambe hi vonile vuswikoti bya kahle bya bolo ya milenge,” wa hlamusela laha a kombiseke ku khensa eka vaseketeri lava va fikeke ku ta seketela mitlangu leyi.