BADUZAH CELTICS YI CAPUTA NKOKWANKOWA CONTINENTAL 

Hi Themba Chauke

Ku tikeriwa ka xipano xa bolo ya milenge xa Nkowankowa Continental swi ya swi dzika eka ligi ya ABC Motsepe Xitirimu xa A, endzhaku ko hluriwa swi khomisa tingana hi xipano xa Baduzah Celtics hi mehelo ya vhiki erivaleni ra mitlangu ra Lulekani, ePhalaborwa. Ku lahlekeriwa loku ku endlile leswaku xipano xi va etshakwini ra ligi hi nkutlunya wun’we ntsena endzhaku ka mitlangu ya nkombo.

Kasi hambi ku ri xipano xa Baduzah Celtics, na xona a xi le ku nyanganyeriweni eka nguva leyi tanihileswi loko xi kongoma eka ntlango lowu a xi ri ehansi ka ntshikelelo, laha loko a xi lo hluriwa a xi ta ya etshakwini ra logo, kambe leswi a swi ta tiveka hi matlangelo ya swin’wana swipano.

Hambiswiritano, va endlile leswi a swi nga languteriwanga hi ku mbeyetela xipano xa Continental ehandle ka ntwelavusiwana. Leswi a swi vonakala hi matlangelo ma vatlangi va le ndzhaku va Continental lava a va tikomba va nga lulamelanga ku tlanga. Xipano xa Celtics, xi tekile vulawuri bya ntlango kusukela emasungulweni laha xi nga howisa tigolo hinkwato ta ntlhanu eka xiphemu xo sungula xa ntlango.  Leswi swi tshovile xipano xa Continental tipiku swi va erivaleni leswaku kuhava lexi va nga xi endlaka eka xiphemu xa vumbirhi.

Ku hlula loku ku nyikile ntshembho eka xipano xa Baduzah Celtics, lava koteke ku huma etshakwini ra tafula ra ligi, loko xipano xa Nkowankowa Continental xi taleriwile hi swivutiso ku hundza tihlamulo loko xa ha lava tindlela ta matlangelo ma kahle. Hi hala tlhelo, xipano xa White Vultures xi vile na mahelo ma vhiki mo khomisa tingana endzhaku ka ku lahlekeriwa eka ntlango wa xona na Tshakuma Tsha Madzivhandila hi Mugqivela exifundzenintsongo xa Vhembe. White Vultures yo va na mikutlunya yinharhu ntsena endzhaku ka mitlangu ya nkombo, leswi endlaka leswaku va tikuma va lwela xiyimo xa le hansi na xipano xa Nkowankowa Continental lexi nga na nkutlunya wun’we hi mitlangu leyi ringanaka.

Xiyimo xi kombisa leswaku White Vultures loko yi lava ku pona xihloka, a yi fanelanga ku lahlekeriwa hi wun’wana ntlango, hikuva loko xo lahlekeriwa hi ntlango lowu landzelaka, loko xipano xa Nkowankowa Continental xo hlula, swi nga ha veka xipano xa White Vultures eka ntshikelelo. Kasi swipano haswimbirhi swi languteriwa ku tirha hi matimba ku papalata xihloka. Mitlangu leyi nga ta lendzela hi mugqivela yi ta va ya nkoka swinene eka swipano leswi hikuva loko swo hluriwa swi ta endla leswaku swi ya swi wela eriweni ra ku tsemiwa hi xihloka, tanhihileswi swi nga le tshakwini ra tafula ra ligi.