MPHENI YI HLULA MUSINA
Hi Themba Chauke
Ku hlula ka xipano xa Mpheni Home Defenders hi 2-1, ehenhla ka xipano xa Musina United, swi yisa emahlweni ku hlula ka xipano ehandle ko hluriwa eka mitlangu hinkwayo leyi xi yi tlangeke eka nguva leyi eka Ligi ya ABC Motsepe kusukela loko nguva yi sungurile. Leswi swi tiyisisa ku khomelela ka xipano emaninginingini ya ligi, leyi tikombaka yi ri hava mutlhontlhi. Hi nkarhi lowu a xi tlanga ekaya, Mpheni yi tikombile yi tshembha leswaku yi nga hlula hi ku olova. Hambiswiritano, xipano xa Musina United, a ku nga ri ku dya byi rhelela. Vaendzi va kombisile matlangelo ma kahle, va ala ku tshama endzhaku va sirhelela.
Ehandle ka sweswo, va tekile ntlangu va wu kongomisa eka xipano xa le kaya, laha a va kombisa matlangelo mo fana na Mpheni eka mahangalaselo ya bolo. Leswi swi tlhele swi endla leswaku va va na mikateko yo hlaya yo howisa, leswi endleke leswaku vahlaleri va le kaya va tshama hi rihlanguti. Ku cinca ku vile kona eka xiphemu xo sungula loko Musina yi rivala, endzhaku ka loko un’wana wa mutlangi wa vona a wisiwile. Hi ku ehleketa leswaku ntlangu wu ta yimisiwa. Hambiswiritano, n’watipepe u pfumelerile ntlangu ku ya emahlweni, leswi endleke leswaku Mpheni Home Defenders yi hangalasa vatlangi va le ndzhaku va Musina, va howisa golo hi nkarhi lowu vatlangi va Musina a va ha dya marhambu ya nhloko.
Ehandle ko koreliwa, Musina United a yi tshamanga ehansi yi rivala hi ntlangu. Va yile emahlweni va hlasela, xikan’we na ku tisa ntshembho eka matlangelo ya vona. Ku hlasela ka vona swi tswarile mihandzu hi nkarhi lowu a ku sele timinete tintsongo leswaku ntlangu wu ya eku wiseni laha va nga howisa golo yo ringanisa swikoro swi ku 1-1. Xikoro xo ringanisa a ku ri mbuyelo wa xipano wo hlasela hi xikongomelo xa leswaku va ya eku wiseni hi swikoro swo ringana. Loko ntlangu wu vuya eka xiphemu xa vumbirhi, xipano xa Musina xi vuyile xi tiyimiserile ku tlula mpimo, leswi tlheleke swi endla vaseketeri va Mpheni ku tshama hi rihlanguti nakambe, hi ku alela xipano xa vona ku lawula ntlangu hinkwawo.
Vaendzi a va sirhelela hi ndlela ya xiyimo xa le henhla, hi ku pfala mavangwa, xikan’we na ku ya emahlweni va hlasela xipano xa Mpheni. Kasi hi hala tlhelo, va bohekile ku cela swinene, hi ku kombisa ku tiyisela hi nkarhi lowu a va lava xikoro lexi a xi ta hambanyisa ntlangu. Loko ntlangu wa ha ya emahlweni, ku vile na ku tshwukiselana mahlo endzeni ka rivala, leswi a swi tikomba leswaku xin’wana xipano xi nga ha howisa nkarhi wun’wana na wun’wana. Xipano xa Musina xi khomile ntlangu hi ku tiyisisa leswaku ntlangu wu fika emakumu hi swikoro swo ringana.
Hambiswiritano, hi nkarhi lowu a ku sele timinete tintsongo leswaku ntlangu wu fika emakumu, xipano xa Mpheni xi kotile ku boxeketa vatlangi va le ndzhaku va Musina, ku kota ku howisa golo leyi nga hambanyisa ntlangu hi 2-1. Golo leyi yi endlile leswaku vaseketeri va Mpheni va tlangela hi nyanyuko wa le henhla swinene, loko van’wana va nghena endzeni ka rivala hi ku tsaka, ku katsa na ku ba tibele ta timovha. Ku howisa hi nkarhi lowu a wu dyiwile hi makondlo swi kombisa ku hlula ka nkoka eka Mpheni Home Defenders, leswi endleke leswaku va teka mikutlunya hinkwayo xikan’we na ku yisa emahlweni matlangelo ya vona yo ka ya nga se hluriwa. Leswi swi tlhela swi pfula vangwa rikulu emaninginingini ya ligi, leswi endlaka leswaku xipano xa Tzaneen United lexi nga le ka xiyimo xa vumbirhi xi tikeriwa swinene ku hlongorisa xipano xa Mpheni.