VAHLAPFA VA KHOMERIWA KU YIVA SWIFUWO

Hi Themba Chauke

Vahlapfa vambirhi vo ta va huma hi le Mozambiki, va malembe ma 33 na 49, va gweviwile ku ya tshama ekhotsweni hi khoto ya xifundza ya Giyani, endzhaku ka ku kumeka va ri ku yevuleni ka homu emakhwatini ma le Giyani elokixini ra le ti-A. Ku vuriwa leswaku loko lava va ta khomiwa, maphorisa a ma ri ku endleni ka ntirho wo valanga, loko va kuma vuxokoxoko by leswaku ku na vanhu lava dlayaka swifuwo ekhwatini ra le kusuhi na ndhawu yo cukumeta malakatsa ehandle ka lokoxi ra le ti-A. Loko va fika, maphorisa ma kumile vaehleketeleriwa vambirhi lava katsaka, Robert Chauke wa malembe ma 33, na Silver Ndlovu wa malembe ma 49, va ri ku yevuleni no tsemelela nyama ya homu.

Vaehleketeleriwa va khomiwile xikan’wekan’we, na swona nyama leyi kumiweke endhawini liya yi tekiwile. Loko va khomiwa, vaehleketeleriwa va tivisile maphorisa leswaku ku na yin’wana nyama yo tsemeleriwa leyi vekiweke eka yin’wana ya tibucari elokixini ra le ti A.

Maphorisa ma landzelerisile vuxokoxoko lebyi, ma kongoma eka bucari leyi, laha nyama yi nga kumeka. N’wini wa bucari u tsandzekile ku nyika nhlamuselo yo enetiseka leswaku nyama leyi yi huma kwihi, leswi endleke leswaku a khomiwa na vatirhi vakwe vambirhi. Leswi swi endlile leswaku nhlayo ya vanhu lava khomeriweke nyama yo yiviwa yi fika eka ntlhanu, ku nga vahlapfa vambirhi, n’wini wa bucari na vatirhi vakwe vambirhi. Nandzu lowu a wu nyikiwile Warrant Officer Masenyani Nature Ngobeni, loyi a hundzeke emisaveni endzhaku ka mavhiki mambirhi. Leswi swi endlile leswaku nandzu lowu wu nyikiwa xipano xo tirha hi vukhamba bya swifuwo na swilo leswi nga le ka khombo, eka xifundzakulu xa Limpopo, Khomandara Kolonele Jabu Elizabeth Mbete, loyi a tiyisiseke leswaku mhaka leyi ya lavisisiwa hi vuenti xikan’we na ku tengiwa ekhoto.

Hi nkarhi wa swikombelo swo endla beyili, n’wini wa bucari na vatirhi vakwe vambirhi, va nyikiwile beyili, loko vahlapfa va aleriwile beyili hikokwalaho ko pfumala maphepha ya vutitivisi laha tikweni. Hi nkarhi wa ku tengiwa ka nandzu, vahehliwa va pfumerile nandzu wo yiva swifuwo laha va nga gweviwa eka nandzu lowu xikan’we na ku tlula nawu wa vuhlapfa.

Loko va nyikiwa xigwevo, khoto yi va marhekile swigwevo swo hlaya leswi katsaka khume ra melembe hi vukhamba bya swifuwo, tin’weti ta tsevu hi tihanyi eka swifuwo, na lembe rin’we ro dlaya swifuwo ehandle ka le bucari, na malembe mambirhi mo tlula nawu wa vuhlapfa. Kasi n’wini wa bucari na vatirhi vakwe vambirhi va ta tlhelela ekhoto hi siku ra 11 Nyenyankulu 2026.

Khomixinara wa maphorisa ma Limpopo Lieutenant General Thembi Hadebe, u hoyezerile Kolonele Mbete eka ntirho lowu endliweke hi maphorisa ku fika eka ku gweviwa ka vahehliwa lava.