HOSI SIYANDHANI A HLULA NAKAMBE

Hi Themba Chauke

Endzhaku ka ku hlula eka xileriso xa khoto ku sivela Hosi Ngove ku xavisa switandi eka tindhawu leti welaka ehansi ka vufambisi bya mfumo-xivongo wa ka Siyandhani lembe leri hundzeke, Hosi Siyandhani u tlhele a hlula eka xileriso xin’wana xo lwisana na miako yo ka yi nga ri enawini ehansi ka vufambisi bya yena.

Nkwetlembetano exikarhi ka Hosi Siyandhani na Hosi Ngove i khale wu ri kona, kambe wu humele erivaleni hi lembe ra 2010, endzhaku ka loko Hosi Siyandhani a nyikiwile mali ya swikoxo swa misava kutani a sungula tiphurojeke to hluvukisa ndhawu ya yena.

Kasi Hosi Ngove, a teka Hosi Siyandhani tanihi ndhuna, na swona u ya emahlweni a vula leswaku Hosi Siyandhani i nandza wa yena, kumbe Ndhuna. Leswi swi endlile leswaku a tlhontlha nhluvuko, a vula leswaku misava yi wela ehansi ka vulawuri bya yena a tlhela a vula leswaku a fanele a tivisiwile ku nga se endliwa nhluvuko wun’wana na wun’wana. Mhaka leyi yi fikile na le Khoto ya le Henhla, laha nkwetlembetano lowu wu nga ahluriwa hi ndlela leyi yimaka na Hosi Siyandhani xikan’we na vuhosi bya mfumo-xivongo wa ka Siyandhani.

Khoto yi bohile leswaku Hosi Siyandhani, hi yena a nga na matimba ya vulawuri bya misava yi tlhela yi sivela Hosi Ngove ku tsema switandi, kumbe ku teka swibalo endhawini liya. Endzhaku ka malembe, hi lembe ra 2020, Hosi Siyandhani u hlambanyiwile ximfumo tanihi Hosi ya le ndhawini liya.

Hambiswiritano, nkwetlembetano a wu helanga, Hosi Ngove u yile emahlweni a tlhontlha ku hlambanyiwa ka Hosi Siyandhani. U byerile tindhuna leti yimaka na yena ku ya emahlweni ti tsema switandi eka tindhawu leti khoto yi leriseke leswaku ti wela ehansi ka vuhosi bya mfumo-xivongo wa ka Siyandhani.

Leswi swi endlile leswaku ku va na vuahluri byin’wana hi siku ra ti 25 Nyenyankulu 2025, leswi tiyisisaka leswaku Hosi Siyandhani u na vulawuri xikan’we na mfanelo ya misava, xikan’we na ku sivela Hosi Ngove ku tsema switandi kumbe ku hakerisa mali ya swibalo eka misava leyi welaka ehansi ka vulawuri bya Hosi Siyandhani.

Kasi nyimpi ya sweswi ya xinawu yi fambelana na miako exivindzini xa doroba ra Giyani, leswi ku nga xiphemu xa misava leyi welaka ehansi ka vufambisi bya Hosi Siyandhani. Ku ya hi vuahluri lebyi veke kona hi siku ra 28 Sunguti 2026, byi vula leswaku Hosi Siyandhani, Yusto Famanda Chabalala, wa Vohosi bya mfumo-xivongo wa ka Siyandhani, u hlurile ekhoto ehenhla ka miako leyi akiweke swi nga ri enawini eka misava leyi nga le hansi ka yena.

Mhaka leyi a yi yisiwile ekhoto ku lwisana na Rector Ngobeni wa Kereke ya Unity Fellowship, tanihi muanguri wo sungula; Tshisaphungo Theopilus Mukhuba, i muanguri wa vumbirhi; na Pheni Cyprian Ngove, ku nga Hosi Ngove, wa vuhosi bya mfumo-xivongo wa ka Mabunda, a a ri muanguri wa vunharhu.

Eka vuahluri lebyi, khoto yi yimile na Hosi Siyandhani yi tlhela yi lerisa leswaku vaanguri lavanharhu va siveriwa xikan’we na ku aleriwa ku ya emahlweni na phurojeke yo aka eka xitandi xa nomboro 0010, Block 19, lexi welaka ehansi ka vufambisi bya Hosi Siyandhani. Ku vuriwa leswaku loko va lava ku endla vumaki, va fanele ku tihlanganisa na vuhosi lebyi lawulaka ndhawu liya ku kuma phomende ya mpfumelelo wo tirhisa ndhawu (PTO)

Khoto yi tshikelerile yi vula leswaku ku nga endliwi nchumu eka ndhawu liya, ehandle ko landzelela tindlela leti faneleke ku kuma maphepha lama faneleke yo yisa migingiriko emahlweni. Lavanharhu va tlhele va lerisiwa ku hlenga tihakelo ta ntshamo wa le khoto eka mhaka leyi.

Loko a angula eka vuahluri lebyi, gqweta leri yimelaka, vuhosi bya mfumo-xivongo wa ka Siyandhani, Gezani Maluleke, u vule leswaku goza leri nga ta landzela i ku ya ekhoto ku ya kuma xileriso ehenhla ka tindhuna leti ta ha yimaka na Hosi Ngove, kambe ti ri ehansi ka misava ya vuhosi bya mfumo-xivongo wa ka Siyandhani “Hi lava ku gimeta mhaka leyi, ku kota ku kuma xileriso ekhoto ku sivela ku tsemiwa ka switandi swa ka Siyandhani leswi kondleteriwaka hi Hosi Ngove. Ku fikelela sweswo, hi ta endla xikombelo xa xileriso lexi nga ta tiyisisa leswaku tindhuna leti yaka emahlweni ti tsema switandi hi swileriso swa Hosi Ngove, eka misava ya ka Siyandhani, swi tiyisisiwa hi Khoto leswaku, a va na matimba yo endla mhaka leyi,” ku vula yena.

Ku vuriwa leswaku ka ha ri na tindhuna ehansi ka misava ya mfumo-xivongo wa ka Siyandhani leti ta ha titshegaka hi Hosi Ngove, na swona ti ya emahlweni na ku tsema switandi ehandle ka mpfumelelo wa Hosi Siyandhani.