KOKWANI DALA A TISA NTSHEMBHO EKA VADYONDZI

Hi Themba Chauke

Hi ku hlohloteriwa hi rirhandzu ra ntiyiso eka vaaki xikan’we na ku tekela enhlokweni vutihlamuleri byo hoxa xandla emugangeni, nhlangano wa Kokwani Dala Foundation, wu tshambulutile xandla wu nyika nseketelo wo khomeka eka vadyondzi lava sweleke exikolweni xa le hansi xa Jim Nghalalume emugangeni wa ka Jim.

Nhlangano lowu wu tumbuluxiwile hi David Zitha, loyi a dumeke hi vito ra Kokwani Dala, na swona wu tumbuluxiwile hi xikongomelo xo pfuna vanhu lava pfumalaka, lava katsaka vana va xikolo, vaholi va mudende, eka miganga leyi hlanganaka na ku tikeriwa hi swa timali. Nhlangano wu lava ku vuyisela xindzhuti xikan’we na ku antswisa xiyimo xa vutomi bya lava hanyaka evuswetini.

Zitha, loyi a tswariweke xikan’we no kulela emugangeni lowu wa ka Jim, u vula leswaku xiboho xo sungula pfhumba leri eka xikolo lexi a dyondzeke eka xona u swi endlile hi ku tiyimisela na hi ku navela ka yena. U vule leswaku u titwa a hlangana swinene na xikolo xikan’we na muganga leswi n’wi hlohloteleke leswaku a nyikela lomu rendzo rakwe ri sunguleke kona.

“Nhlangano lowu wu tumbuluxiwile hi xikongomelo xo pfuna lava sweleke, na swona a wu tirheli ntsena eka muganga wa ka Jim, kambe wu tlhela wu pfuna na le ka tindhawu leti wu vonaka leswaku ti lava mpfuno,” ku vula yena.

 “Hambiswiritano, ndzi tekile xiboho xo sungula laha kaya, hikuva ndzi tswaleriwile emugangeni lowu, ndzi tlhela ndzi dyondza eka xikolo lexi. Tanihileswi va vulaka leswaku, ku nyikela swi sungula ekaya. A ndzi lava ku endla xikombiso leswaku loko hi pfuna yin’wana miganga, vanhu va nga vuli leswaku hi tshikile lava nga va hina,” wa engetela.

Nhlangano wa yena wu nyikerile hi yunifomo eka vadyondzi va 43, eka ntirho lowu a wu khomeriwile exikolweni xa le Hansi xa Jim Nghalalume. Hambiswiritano, Zitha u vurile leswaku nhlangano wa yena wu tshembhela eka swihanano xikan’we na malwandla ya vaaki, a vula leswaku nseketelo wa vaaki wu ta tshama wu ri wa nkoka ku yisa emahlweni gingiriko lowu.

 “Ntirho wa hina wu kotile ku humelela hikokwalaho ka ku nyikela ka vanhu va ntolovelo. Hi hlohlotela un’wana na un’wana loyi a nga kotaka ku pfuna ku tihlanganisa na hina leswaku hinkwerhu hi ta tisa ku cinca eka vutomi bya vana lava sweleke,” wa ha hlamusela.

Nhloko ya xikolo, Sevha Maswanganyi, u vule leswaku swihanano leswi swi ta tisa ku cinca lokukulu eka vadyondzi lava hlanganaka na mitlhontlho hikokwalaho ka vusweti endhawini liya. U vule leswaku vadyondzisi hi vona timbhoni ta ku khumbheka ka vana emiehleketweni hikwalaho ka ku tikeriwa hi swa timali.

“Lava pfumalaka yunifomo hi mikarhi yo hlaya, va pfumala ntshembho. Va tsandzeka ku tinghenelerisa eka migingiriko ya le titlilasini, na swona hi mikarhi yin’wana, va kanakana ku yimisa mavoko, hikuva a va titwi kahle, na ku khomiwa hi tingana,” wa hlamusela.

Maswanganyi u yile emahlweni a vula leswaku van’wana vadyondzi va langutana na swiyimo swo tika swinene, leswi khumbhaka xindzhuti xa vona. “Van’wana vadyondzi a va ngheniseli tihembhe hikuva tiburuku ta vona ti handzukile, kumbe tiziphu ti onhakile,” u ya emahlweni.

 “Loko hi vona leswi, swa hi vavisa swinene, hikuva hi twisisa swiyimo swa lomu va humaka kona,” nhloko ya xikolo wa hlamusela, laha a nga khensa Zitha ku vuya a ta pfuna laha a nga tshama a dyondza kona.

Kasi mutshamaxitulu wa huvo ya vufambisi bya xikolo, Eric Maluleke, u hlamuserile pfhumba leri tanihi pfhumba ra nkoka, leri pfunaka ku hundza eka ku nyikela hi swiambalo. U komberile vaaki, van’wamabindzu, na swin’wana swiyenge ku seketela mapfhumba lama fanaka.

“Swihanano leswi, a hi mhaka ya yunifomo ntsena. I ku vuyisela xindzhuti, ku aka ntsembho, xikan’we na ku nyika vadyondzi nkateko wa kahle wo kongomana na tidyondzo ta vona xikan’we na vumundzuku bya vona,” ku vula yena, laha a nga khensa nhlangano eka swihanano leswi.