MEC NA KHOMIXINARA VA RHANGELA PFHUMBA RO NYIKELA
Hi Themba Chauke
MEC wa Vutleketli na Vuhlayiseki bya Vaki eLimpopo, Violet Mathye, xikan’we na Khomixinara wa Maphorisa ya Xifundzakulu xa Limpopo, Lieutenant Jenerali Thembi Hadebe, va rhangerile pfhumba ro nyikela yunifomo ya xikolo xikan’we na swakudya eka miganga leyi weriweke hi khombo ra ndhambi eGiyani na le Bolobedu ehansi ka masipala wa xifundzantsongo xa Mopani.
Pfhumba leri i xiphemu xa matshalatshala ya mfumo xo pfuna na ku vuyisela xindzhuti eka vadyondzi na mindyangu leyi hlaseriweke hi ndhambi emugangeni wa le Mbaula, eGiyani. Tanihi xiphemu xa pfhumba, ku nyikeriwile hi yunifomo eka vadyondzi va 83, eka swikolo swimbirhi emugangeni wa le Mbaula, leswi katsaka, 56 exikolweni xa le hansi xa Nyiko na 27 exikolweni xa le henhla xa Masiza.
Ehenhla ka yunifomo, swakudya swi nyikeriwile eka mindyangu leyi voniweke yi swerile ekerekeni ya New Creation Tebernacle of Grace, emugangeni wa Bellevue. Ntirho lowu wo nyikela a wu ngheneriwile hi swirho swa le henhla swa maphorisa, varhangeri va vaaki na swiyenge swo hambana-hambana.
Loko a vulavula hi nkarhi wa ntirho, Lieutenant Jenerali Thembi Hadebe, u vule leswaku maphorisa ya Afrika-Dzonga, hi ku tirhisana na swiyenge swa mpfuno wa vaaki, va ha tiyimiserile ku nyikela eka vaaki hi ku vekisa eka vadyondzi.
“Maphorisa ya tiko ra Afrika-Dzonga, hi ku tirhisana na swiyenge swa vaaki, hi tinyiketerile ku vekisa eka vumundzuku bya n’wina. Loko hi vekisa eka dyondzo, hi vekisa eka mundzuku la vangameke, laha vadyondzi va nga sukaka eka swiyimo swa vona, va tshova mindzhukano, va va varhangeri va mundzuku,” ku vula yena.
U hlohloterile vadyondzi ku tshama va kongomanile na tidyondzo leswaku va ta tshova mindzhukano ya vusweti emigangeni ya ka vona, laha a nga va hlohlotela ku papalata timhaka ta vugevenga, leswi nga onhaka vumundzuku bya vona. “Loko vuxokoxoko bya n’wina byo totiwa hi milandzu ya vugevenga, mi ta tikeriwa ku kuma mitirho kun’wana na kun’wana eAfrika-Dzonga, hambiloko mo heta xikolo,” wa lemukisa, laha a tsundzuxeke vadyondzi leswaku va fanele ku mangala ku xanisiwa na vubihi byihi kumbe byihi emaphoriseni kumbe eka vadyondzisi va vona.
Kasi MEC Violet Mathye, u khensile maphorisa ya tiko ra Afrika-Dzonga ku yisa emahlweni nseketelo eka vaaki hi nkarhi wa ndhambhi, xikan’we na le ndzhaku ka ndhambi. U tshikelerile hi nkoka wa ntirhisano exikarhi ka mfumo na vaaki a tlhela a hlohlotela vadyondzi ku tshama va tinyiketerile eka tidyondzo ta vona.
“Kuhava xa mahala emisaveni leyi, Ku humelela swi ta hi ku tirha hi matimba, ku tinyiketela, xikan’we na ku tiyisela. Loko mi nga endli sweswo, swi vula ku ri mi lahlekile,” u byela vadyondzi, laha a va hlohloteleke leswaku va fanele ku teka hi ku hetiseka nkateko wa ntseketelo lowu va nyikiweke wona na ku lwela ku fikelela swikongomelo swa vona swa tidyondzo.