Opinion | Xana ku lwa ka Mavandla ya Vantima swi Pfuna Yini?

Afrika-Dzonga leyi simekiweke eka magandzelo ya tinhenha ta ntshuxeko wa vanhu vantima, a swi fanela leswaku mavandla ya swa tipolitiki ya vantima ya yima swin’we ku lwela vululami, ndzingano eka vanhu hinkwavo, na ku cinca loku ku vonakalaka.  Kambe leswi hi swi vonaka namuntlha swa vavisa—ku avana, Ku lwa exikarhi ka vanhu, ku rhuketelana ni makwanga.

Xana hi va vhotelerile leswaku va hi tirhela, kumbe leswaku va tirhela swilaveko swa
vona ntsena?

Vunyingi bya vantima laha tikweni ra Afrika-Dzonga byi ya emahlweni byi langutana na swiphiqo swo tala. Mamiliyoni ya vanhu va hanya evuswetini. Ku pfumaleka ka mitirho eka vantshwa ku tshama ku ri ehenhla swinene. Swibedlele swa mfumo swa wa hikokwalaho ka vufambisi byo biha. Hambiswiritano, ematshan’wini yo hlangana ku lwisana na mitlhotlho leyi ya mafambiselo, varhangeri va hina va ya emahlweni va lwa.

I ku xenga vavhoti loko varhangeri va tipolitiki va rhangisa ku lwa tinyimpi ta vona vinyi ku tlula ku tirhela lava va nga va vhotela. Swi heta matimba ku vona varhangeri va ntokoto, va lwa emahlweni ka vaaki hi mhaka leyi nga khumbhiki vaaki ematshan’weni ya ku hlangana leswaku va ta kota ku tirhela vaaki.

Kasi nchumu lowu lweriwaka i yini? I ntirho wa ku pfuna vanhu, kumbe ku endla vito
ntsena?

A swi hoxekanga leswaku mavandla ya vantima ya hambana hi miehleketo. Hambiswiritano, leswi a swi nga fanelanga swi va mhaka leyi yi endlaka leswaku va hlaselana, kambe a swi fanerile leswaku va kuma nchumu wun’we lowu nga ta va mhaka leyi endlaka leswaku va tirhisana ku aka tiko.

Ku hambana hi mavonelo a swi fanelanga ku hundzuka xivangelo lexi nga ta endla leswaku mi vulana valala exikarhi ka vanhu loko kuve mi lwela swilo swo fana.

Vanhu va langutile. Va ya emahlweni va heleriwa hi ntshembo. Va vutisa swivutiso wo tika:
Xana ku yimeriwile ku tsakela ka mani?

Ha yini varhangeri va vantima va hatlisa ku lwa, kambe va nonoka ku lwisana ni
vusweti?

Afrika-Dzonga a ri lavi huwa yo tala ya tipolitiki, kambe ro lava munhu loyi a nga na ku tsakela eka tipolitiki ku ntshuxa vanhu. Swi lava vun’we lebyi nga na xikongomelo. Swi lava leswaku mavandla ya tipolitiki ya vantima ya tsundzuka leswaku nala wa ntiyiso a hi un’wana, kambe ku kala ka ndzingano, ku pfumaleka ka vululami ni fambiselo leri ra ha siyaka vo tala endzhaku, ndzi nga rivali mitirho na vugevenga.

Lexi i xirhambo xa vun’we bya vantima, ku nga ri hi vito, kambe hi swiendlo.