Masipala wu Hoxa Timboni.

Hi Themba Chauke

Ku tikeriwa loku vaaki ku nga khale va langutanile na kona ko tikuma va haganekile na vusiku swi ta fika emakumu ku nga ri khale. Leswi swi landzela pfhumba ra sweswi ra masipala wa Giyani, lowu wu tiviseke n’watikotiraka ximfumo loyi a nga ta sungula ku hoxa timboni ta le switarateni ta 154, leti ku vuriwaka leswaku ti hlayisa ndzilo eka tindlela ti mbirhi ta nkoka edorobeni.

Phurojeke leyi ya timboni, ku vuriwa leswaku yi ta famba kusuka exivindzini xa doroba ra Giyani, ku fika exibedlele xa Khensani hi ku tirhisa ndlela ya le Kholichi ya Lethaba, endzhaku ka miako ya le khale ka le palamende, eka patu leri vaaki va ri vitanaka Palamende.

Loko a vutisiwa hi mhaka leyi, muvulavuleri wa masipala wa Giyani Steven Mavunda u vurile leswaku nhluvuko lowu a wo endleriwa ntsena ku voninga. U vurile leswaku pfhumba leri ri languteriwa leswaku ri ta antswisa vuhlayiseki hi xiyimo xa le henhla, na mafambelo hi mikarhi ya vusiku, ngopfu-ngopfu van’wamilenge lava hi mikarhi yo hlaya va kongomaka emakaya nivusiku loko va vuya emitirhweni, emavhengeleni, kumbe ku endzela varhandziwa va vona exibedlele.

Mavunda u hlamuserile leswaku, hi ku voninga tindhawu leti, masipala wu lava ku hunguta nxungeto wa vugevenga, ku antswisa vuhlayiseki bya le magondzweni, na ku tlakusa vuhlayiseki bya vaaki.

“Xikongomelo xa hina i ku yisa emahlweni xiyimo lexi hlayisekeke endhawini ya hina hi ku hunguta tihlayo ta vugevenga. Pfhumba leri ri kombisa xiphemu xa vu nharhu xa matshalatshala ya hina. Hi sungurile hi vekela timboni ta le switarateni edorobeni, egondzweni ra R81. Sweswi hi langutanile na tindlela leti ti hlanganisaka Xibedlele xa Khensani,” wa hlamusela laha a nga kombisa leswaku phurojeke leyi yi languteriwa ku
fika emakumu hi tin’hweti ta Khume.

Hambiswiritano, loko pfhumba ra ha ya emahlweni, masipala wu langutanile na ntlhotlho wa vukhamba bya titambhu ta gezi. Vukhamba lebyi byi siyile tin’wana ta timboni ta le switarateni edorobeni leti ti hoxiweke eka phurojeke ya xiphemu xo sungula ti nga ri ku tirheni.

Loko a angula eka mhaka leyi, Mavunda u komberile vaaki ku mangala maendlelo lawa ya ehleketelerisaka emaphoriseni ku pfuneta ku sivela ku onhiwa ka timboni ta le switarateni. “Vanhu va fanele ku twisisa leswaku timboni leti ti hoxeriwile vuhlayiseki bya vona, naswona hikokwalaho ka sweswo va fanele ku swi sirhelela ku fana na loko swi ri swa vona,” u ya emahlweni.

Kasi ku tirhisa thekinoloji yo hlayisa ndzilo swi kombisa matshalatshala ya masipala ya maendlelo ya manguvalawa yo tekela mbango enhlokweni, leswi tlhelaka swi pfuna ku hunguta tihakelo ta le henhla na ku tirhisa ndzilo wo hlaya.