XIKOLO XI KUMA SWITIRHISIWA

Hi Themba Chauke

Rhavi ra vhengele ra Buco eGiyani, hi ku tirhisana na Kholichi ya Vurimi ya Limpopo, va nyikerile hi switirhisiwa swa vurimi eka xikolo xa le Henhla xa Kheto Nxumalo eGiyani, eka matshalatshala yo tiyisisa tidyondzo ta vurimi hi ku endla na ku seketela tidyondzo ta vurimi exikolweni.

Minyikelo ley yi vile kona hi Ravumune, na swona swihanano leswi swi katsa switirhisiwa swo hambana-hambana swo fana na swilexele, swipedi, tifoxolo, tigirivani na swin’wana switirhisiwa swa nkoka swa ntsengo wa kwalomu ka R5 000. Switirhisiwa leswi swi languteriwa ku pfuna vana va xikolo ku endla migingiriko ya mavoka ya vurimi na ku antswisa pfhumba ra tidyondzo ta vurimi eka xikolo.

Loko a vulavula hi nkarhi wa ntirho, mufambisi wa Kholichi ya Vurimi ya Limpopo Musa Baloyi, u vule leswaku kholichi yi vekile etipapeni ta yona xikolo xa le henhla xa Kheto Nxumalo na Xikolo xo Hlawuleka xa Pfunanani tanihi tindhawu leti va nga ta yisa emahlweni vuleteri bya vurimi etindhawini ta Giyani.

 “Hi seketela swikolo leswi hi swilo swo hambana-hambana, swo fana na vuleteri bya vurimi, swimilana na switirhisiwa swa vurimi leswi lavekaka ku yisa emahlweni migingiriko ya tidyondzo ta vurimi,” ku vula Baloyi.

Baloyi u kombisile leswaku va endlile vuxaka na Buco Giyani endzhaku ka ku langutisa mitlhontlho leyi langutaneke na swikolo loko swi ta eka switirhisiwa swa vurimi leswi lavekaka eka tidyondzo ta vurimi.

Nhloko ya Ndzawulo ya Tidyondzo ta Vurimi exikolweni, Shonisani Nengwani, u amukerile swihanano a vula leswaku swi ta pfuna swinene ku antswisa dyondzo ya mavoko eka vadyondzi lava dyondzaka dyondzo ya vurimi. “Hi tsakile swinene ku kuma switirhisiwa leswi hikuva a hi ri na mitlhontlho ya mitirho ya mavoko hikwalaho ka ku pfumaleka ka switirhisiwa swa vurimi, leswi a swi hi tikisela swinene, kambe sweswi se swi lulamisiwile,” ku vula yena.

Nengwani u vule leswaku nkayivelo wa switirhisiwa swa vurimi a swi tikisela vadyondzi ku nghenelela hi ku hetiseka eka mitirho ya mavoko loko swi ta eka vuleteri bya vurimi, leswi swi nga na nkoka swinene eka tidyondzo ta vurimi. U vurile leswaku switirhisiwa leswi va nyikeriweke hi swona swi ta pfuna vadyondzi ku tirha hi ku hetiseka eka swirhapa swa xikolo ku kuma ntokoto wa vuswikoti bya mtirho ya mavoko.

Mupfuni wa Mufambisi wa Buco eGiyani Eunice Mabunda, u vule leswaku swihanano i xiphemu xa ku tinyiketela ka khamphani ku nyikela eka vaaki na ku seketela mapfhumba ya ndyondzo. “Loko mi langutisa emasin’wini ya vona, mi ta vona leswaku ku na makhwati, switirhisiwa leswi swi ta va pfuna ku basisa na ku lulamisela masimu ya vona leswaku va yisa emahlweni tidyondzo ta vurimi,” wa hlamusela.