XILERISO XO KHOMA N’WAMABINDZU

Hi Themba Chauke

Khoto ya Vugevenga bya Mabindzu ya Polokwane yi humesile xileriso xo khoma n’wamabindzu wa le Giyani Howard Mashaba, loyi a nga na mabindzu yo hlaya lama katsaka tihotela, mathekisi na mabazi leswi nga le hansi ka vito leri tivekaka ra Xilumani eka vaaki

Mashaba a a languteriwile ku tivonakarisa emahlweni ka Khoto ya Vugevenga bya Mabindzu ya Polokwane hi swihehlo swa vuxisi na manyala ya swa timali. Hambiswiritano, a nga kotanga ku fika tanihileswi a a ri eka rendzo ra xibindzu ro ya eChina ehandle ka ku kuma mpfumelelo wo huma ekhoto. Leswi hi swona xivangelo xa leswaku khoto yi humesa xileriso xa leswaku a khomiwa.

Ku ya hi Xiyenge xa Vuchuchisi xa Tiko (NPA), Mashaba u langutanile na milandzu yimbirhi ya vuxisi, wun’we wa vukhamba, yinharhu ya manyala ya swa timali, xikan’we na ku tlula nawu wa xiphemu xa 4,5 na 6 xa Vusirheleri bya Vugevenga byo Kunguhatiwa (POCA)

“Leswi swi katsa ku pfuna munhu un’wana ku vuyeriwa eka migingiriko leyi nga ri ki enawini, ku katsa na ku teka, ku kumeka na ku tirhisa nhundzu yoleyo,” ku vula Muvulavuleri wa NPA ya xifundza Mashudu Malabi.

Mhaka leyi yi ta yi huma eka swihehlo swa leswaku Mashaba u endlile timhaka ta vuxisi ehenhla ka mfumo wa le xikarhi na le ka Ndzawulo Ya Mitirho Ya Vaaki, Mapatu Na Vumaki Ya Limpopo, hi ku endla bindzu ra vun’winyi bya tinhundzu leswi katsaka Alex Howard Mashaba, mufi Fourie Willem Jakobus na Magezi Ben Mashaba, (boti wa Mashaba), hi ku tirhisa khamphani ya Mbangwa Trading and Projects.

Vuxavisi lebyi byi katsa tindhawu leti nga le Kremetart eka switandi swa Erf 2B, Erf 58B, Erf 64B na Erf 227B leswi xaviweke hi ntsengo wa le xikarhi ka R290 000 ku ya eka R450 000, na swona tihakelo ti hakeriwile eka akhawunti ya bangi ya Jakobus.

Ehandle ka vuxavisi lebyi, vun’winyi bya tinhundzu a byi cinciwanga leswi endlaka leswaku byi va ehansi ka mavito ya mfumo wa le xikarhi na Ndzawulo Ya Mitirho Ya Vaaki, Magondzo Na Vumaki Ya Limpopo.

NPA yi tlhela yi hehla leswaku yindlu ya mfumo leyi a yi akiwile eka xitandi xa Erf 58B, yi mbindzimuxiwile laha ku nga akiwa hotela. Mhaka leyi yi hundziseriwile emahlweni ku ya eka siku ra 29 Khotavuxika 2026 ku yimela leswaku Mashaba a vuya eChina leswaku a ta tivonakarisa emahlweni ka khoto. Loko o endla tano, u languteriwa ku ya tenga na vahehliwa kuloni vanharhu.