MAFUYATHA YI HUMA EKA MPHIKIZANO

Hi Pilot Manganyi

Ku huma ka xipano xa bolo ya milenge xa Makuleke Mafuyatha eka mphikizano wa Ligi ya Collins Chabane Local Football Association (LFA), swi vangile swivulavula ngopfungopfu hi tlhelo ra mabulu ya bolo ya milenge, laha ku hehliwaka ku ka Mafuyatha yi nga khomeki kahle na ku avelana rivala ra mitlangu ku nga leswi swi tikombisaka ku ri swin’wana swa swivangelo swa xiboho lexi.

Kuya hi swiviko, njhekanjhekisano wu vile kona exikarhi ka xipano xa bolo ya milenge xa Ntsemi na Mafuyatha hikokwalaho ka ku avelana ka rivala emugangeni wa ka Makuleke. Rivala leri ra mitlangu a ri tirhisiwa hi Mafuyatha ku ringana malembe yo hlaya, kambe swiphiqo swi sungule ku va laha swipano leswi a swi fanele ku tlanga mitlangu hi siku rin’we.

Ku boxiwa leswaku hi nkarhi wa mitlangu, Mafuyatha a yi tlangisiwa hi nkarhi lowu nga fanelangiki, loko Ntsemi yi tlanga hi nkarhi lowu faneleke. Leswi swi tisile ku tika eka malunghiselelo ya xipano xa Mafuyatha, xikan’we na vaseketeri. Leswi swi vangile ku hlundzuka eka vurhangeri bya xipano.

Ehandle ka sweswo, ku vile na ku ehleketelela leswaku van’watipepe va xaviwile leswaku va tikisela xipano xa Mafuyatha hi nkarhi wa mitlangu, leswi a swi tisa ntshikelelo eka xipano xa Mafuyatha. Hambiswiritano, a ku na vumbhoni kumbe vuxokoxoko byo helela mayelana na lebyi seketelaka ku xaviwa ka van’watipepe. Kambe ku na ku pfumela leswaku swihehlo swo fana na leswi hi swona swi nga endla leswaku vurhangeri bya xipano byi teka magoza ya ku tihumesa eka mphikizano wa LFA nguva yi nga si hela. Mafuyatha a ya ha saleriwile hi mitlangu ya khume mbirhi (12) na mikutlunya ya makume mune nkaye (49) eka nguva leyi.

Xiboho lexi xi siyile vaseketeri va avekile hi le xikarhi. Vaseketerikulu va xipano xa Mafuyatha lava tivekaka hi Blue Nation, va kombisile ku khumbheka hi xiyimo xa xipano, laha va nga kombisa leswaku vurhangeri byi fanele ku tiyisisa leswaku swipano swi khomiwa hi ku ringana hinkwaswo. Van’wana va boxile leswaku ku tlhetlha ka Mafuyatha swi tlherisela xipano na mphikizano endzhaku.

Mafuyatha i xipano lexi a xi tiveka tanihi xipano lexi a xi ri xa nghozi eka swipano swa mphikizano wa marhavi ya bolo ya milenge eka ligi ya Collins Chabane. Hi n’hweti ya Mawuwani 2025, xipano xa Mafuyatha xi xavisile xiyimo xa xona xi xavisela Ntsemi loko va nga si nghenelela mphikizano wa nguva ya Collins Chabane LFA 2025/26.

Vurhangeri bya Collins Chabane LFA a byi se humesa xiviko hi mayelana na ku tlhetlha ka Mafuyatha na swihehlo leswi khumbhaka van’watipepe. Tanihiloko Mafuyatha yi tekile xiboho, vaseketeri va kombela leswaku swipano swi khomiwa hi ku ringana