Xana Papa Wawa i Mani?

Hi Themba Chauke

Ntlango wa bolo ya milenge etikweni ra Afrika-Dzonga hi wona wu fambaka emahlweni ku tlula mitlangu hinkwayo, naswona vuseketeri bya ntlango wa bolo ya milenge byi le henhla swinene, leswi swi endlaka leswaku ntlango lowu wu tshama wu ri hungu eka vanhu.

Ntlango lowu a wu vuli nchumu ehandle ka valandzeri va swipano leswi swi tshwimbirisanaka erivaleni ra mitlangu masiku hinkwawo. Masikulawa, hikokwalaho ka swihangalasa mahungu leswi swi nyikaka vaseketeri va bolo ya milenge nkateko wa ku humesela matitwelo ya vona, swi engeterile nyanyulo eka ntlango lowu.

Un’wana loyi a tivekaka swinene tanihi vaseketeri vo pfumala nguva, i Papa Wawa, museketerikulu wa xipano lexi xi fambaka emahlweni hi valandzeri etikweni ra Afrika-Dzonga, naswona xiphikizana na swipano swin’wana eAfrika na le Misaveni hi ku angarhela hi valandzeri. Xipano lexi ku nga va mani ehandle ka xipano xa Kazier Chiefs.

Xana Papa Wawa i mani?

Papa Wawa i Vennentious Trudent Motswi, loyi velekiweke emugangeni wa ka Nwamitwa, eNkambako, ehandlenyana ka doroba ra Tzaneen kwala xifundzhenikulu xa Limpopo. Enkarhini wa sweswi Papa Wawa u kumeka ePitori, elokixini ra Atteridgeville, exifundzheninkulu xa Gauteng. Papa Wawa i mudyondzisi wa tidyondzo ta Tinhlayo laha a nga na ntsevu wa malembe ya ntokoto wa vudyondzisi lebyi. U tlhela a va mutshamaxitulu wa rhavi ra vaseketeri va xipano xa Kaizer Chiefs eAtteridgeville, tlhelo xirho xa Foramu ya vaseketeri va xipano xa Kaizer Chiefs eGauteng laha ku nga na tihofisinkulu ta xipano xa Kaizer Chiefs.

Loko a burisana na phephahungu ra Nthavela, Papa Wawa ute “Ku seketela xipano xa Kaizer Chiefs i xiphemu xa vutomi bya mina, leswi swi nga kotekiki ku swi balekela ehandle ka matlangelo ya xipano. A hi seketeli xipano hikokwalaho ka kuva xi tirha kahle, kambe hikuva hi rhandza xipano lexi hi timbilu ta hina hinkwato.” Marito ya Papa Wawa ya fambelana swinene na maendlelo ya vaseketeri va xipano, lexi sweswi xi nga tirhiki kahle eka Ligi, kambe vaseketeri va tikomba va nga heli matimba ku fana na xivulavulelo xa xipano lexi xi nge ‘ikhosi alipheli umoya’

Loko a vutisiwa leswaku hikokwalaho ka yini a tshamela ro ya hlalela mitlangu ya bolo ya milenge hambi ku nga tlangi xipano xa Kaizer Chiefs, u angule a ku; “Hi hanyela bolo ya milenge, hi tshama hi ri ni ndlala ni torha ro hlalela ntlango lowu wo saseka, ku nga va Chiefs, kumbe xin’wana xipano, rivala ra mitlangu hi laha ndzi kumaka kona ntsako ndzi rivala maxangu ya mina hinkwawo. Swa ndzi pfuna leswaku ndzi tivuyetela na ku kongoma eka leswi ndzi lavaka ku swi fikelela. Papa Wawa a nga se vuta, kambe a nga kombisanga loko a ri ekulaveni ka nsati.

Ku duma ka yena eka timhaka ta ntlango wa bolo ya mielenge etikweni, Papa Wawa u vile ni nkateko wo tirha eka mphikizano wa xidlodlo xa nedbank hi ku endla swinavetiso swa TV, Swihangalasi swa mahungu swa le ka social media na podcast.

Hambileswi xipano xa yena xi nga le ka mphikizano lowu wa Nedbabank, laha xi nga ta tlanga ntlango wo hetelela na xipano xa Orlando Pirates hi siku ra 10 Mudyaxihi 2025, erivaleni ra mitlangu ra Moses Mabhida, eDurban, Papa Wawa hi yena xikandza xa Mphikizano lowu eka ntlango lowu wo hetelela.   Papa Wawa u tlhela a va muyimeri wa Cufa Cup, mphikizano lowu wu humelelaka emasunguleni ya nguva laha xipano xa Kazier Chiefs xi tlangaka na xipano xin’we naswona hi minkarhi yo hlaya, xipano xa hlula eka mphikizano lowu.

“Ndzi museketeri wo sungula kuva na vaseketeri eka migingiriko ya ntlango wa bolo ya milenge laha tikweni,” ku tithemendhela Papa Wawa, loyi hi halatlhelo a nga muyimeri wa vhengele ra swakudya ra Mochachos endhawini ya mavhengele ya Maponya. Hi siku ra ti 9 Khotavuxika, Papa Wawa u tava xivulavuri xo hlohlotela eka ntirho wa Maphorisa ya tiko exifundzheninkulu xa Mpumalanga.