Vaaki va nyikiwa swo tikambela HIV

Hi Mkateko Ndlovu

Munhu un’wana na un’wana u na mfanelo yo tiva rihanyo ra yena, kuva munhu a tiva rihanyo ra yena swi na nkoka swinene. HIV i vuvabyi lebyi byi karhataka swinene eAfrika-Dzonga. Tinhlayo ta vuvabyi bya HIV ti ya ti tlakuka siku na siku ngopfu-ngopfu eka vantshwa. Hi Ravumune wa ti 15 Mudyaxihi 2025 MEC wa Rihanyo eLimpopo u sungurile mapfhumba yo nyika vaaki switirhisiwa swo kambela vuvabyi bya HIV etindhawini ta Tzaneen eka Xifundzhantsongo xa Mopani.

Ku tikambela HIV i endlelo leri munhu a ri endleka hi ku swi rhandza na ku tiyimisela ku nga ri ku sindzisiwa. Ku kamberiwa ka vuvabyi bya HIV ku tirhisiwa marha ni ngati naswona ndzawulo ya rihanyo yi tiyisisa leswaku mbuyelo wa vuvabyi bya munhu wu fanele wu va xihundla.

Xikongomelonkulu xa pfhumba leri i ku antswisa vutomi bya vanhu kuva va tiva rihanyo ra vona hi ku kambela vanhu vuvabyi bya HIV eka vanhu lava va nga se tshamaka va kamberiwa ni lava va nga kamberiwangiki kahle kumbe ku tika ku va fikelela. Eka mapfhumba lawa MEC a tirha hi ku pfunana na vafambisi va vulawuri bya miganga, vafambisi va xibedlele, madokodela ya vana ni vativi va swakudya.

‘’Xiendlekalo lexi i xa ku vuyisa xindzhuti hikuva xi nyika vanhu matimba na ku tifuma ku twisisa xiyimo xa vona xa rihanyo ni vuhlayiseki bya le makaya ya vona. Leswi swi nga pfuna ku hunguta ku soriwa na ku tlakusa mabulo lawa pfulekeke mayelana na HIV’’. ku vula MEC .