Mupfinyi wa Nyikiwa xigwevo xa Rifu
Hi Themba Chauke
Khoto ya Xifundzha ya Giyani yi gwevile wanuna wa malembe ya 25 hi vukhale, Vutivi Climate Chauke ku tshama ekhotsweni xigwevo xa vutomi hi nandzu wo pfinya nhwana wa malembe ya 19, xikan’we na ku tlhandlekela malembe ya 15 hi nandzu wo phangha.
Ku vuriwa leswaku hi siku ra 31 N’hwendzamhala 2021, mutwisiwakuvava a ri ni muhlekisani wa yena emugangeni wa ka Nkuri ka Tomu va ri ku tlangeleni ka murindzelo wa lembe rintshwa. Kwalaho hi laha muehleketeleriwa a nga fika na munghana wa yena loyi a nga tivekiki naswona a ha dyeke ehansi, va nga landza varhandzani lava na ku va chavisela hi mukwana.
Sigevenga leswi swi tekerile muhlekisani wa mutwisiwakuvava titanghu na riqingo ra mutisiwakuvava. Muhlekisani wa mutwisiwakuvava u lerisiwile ku tsutsuma a siya mutwisiwakuvava emavokweni ya tisulavoya leti. Kasi tisulavoya leti ti fambile ni mutwisiwakuvava enhoveni ya le kusuhi laha ti nga n’wi pfinya.
Endzhaku ka sweswo, tisulavoya leti ti tshikile mutwisiwakuvava, loyi a nga ya ekaya ku ya tivisa vandyangu hi mhaka leyi xikan’we na ku pfula nandzu wo pfinya na wo phangha emaphoriseni. Endzhaku ka vulavisisi, muehleketeleriwa wa malembe ya 25, u khomiwile hi siku ra 09 Sunguti 2022, laha a nga tsoniwa beyili ku kondza a gweviwa xigwevo xa vutomi na malembe ya 15 ehenhla hi nandzu wo pfinya na wo phangha.
Khomixinara wa maphorisa ya Xifundzhankulu xa Limpopo Leutanant-Jenerali Thembi Hadebe u amukerile vuahluri lebyi na ku khensa ntirho lowu endliweke hi Sejeni Maropeng Alpheus Mashapa loyi a khomile nandzu lowu.
