Vaaki va Yimisa ku Akiwa ka Xikolo

Hi Mkateko Ndlovu

Vaakatiko kusuka emugangeni wa ka Xikundu eka Xifaxani ehansi ka masipala wa Collins Chabane, va tekile goza leri a ri nga languteriwanga hi siku ra ti 27 Mudyaxihi 2025 laha a va vonakala va dyile makala yo hisa swinene hi ku hlengetelatana va teka xiboho xa ku yimisa migingiriko hinkwayo ya ku akiwa ka xikolo xa le hansi xa Mayeke.

Xiboho lexi xi tekiwile endzhaku ka ku vilela hi vaaki mayelana ni leswi phurojeke leyi yi fambisisiwaka xiswona. Leswi swi endlile leswaku vaaki xikan’we na foramu ya nhluvukiso wa muganga wa ka Xifaxani va rhumela papila ro kombisa ku vilela eka varhangeri, laha va nga longoloxa swivilelo swa vona hinkwaswo.

Xin’wana xa swivilelo swa vona hi leswaku mukontiraka u tile ni vatirhi vo hlaya ku ta tirha eka phurojeke leyi ehandle ka ku thola vaaki va ka Xifaxani, naswona vatirhi lava thoriweke eka Xifaxani i va ntsongo va tlhela va boheka ku tirha hi ku siyerisana. Leswi hi swona swi nga endla leswaku vaaki va teka xiboho xo yimisa migingiriko hinkwayo ya ntirho lowu ku kondza va kuma nhlamulo yo tiya ku enerisa swivilelo swa vona.

Hambiswiritano ntlawa wa vantshwa wa Sanco wu hlamusela leswaku wu amukela no seketela xiboho lexi tekiweke hi vaaki. Va kombisa leswaku va ta teka swivilelo swa vaaki va swi yisa eka Ndzawulo ya Mitirho ya Mfumo ku tiyisisa leswaku swirilo hinkwaswo swa vaaki swi tekeriwa enhlokweni.

Va tlherile va vula leswaku va ni ku tshembha lokunkulu leswaku swiphiqho leswi swi ta lulamisiwa hi nkarhi lowu nga hetiki mbilu. Va yile emahlweni va kombisa leswaku va sola swinene matikhomelo ya mukhaselara wa wadi 28 kuva a tsandzeka ku lulamisa mhaka leyi hindlela leyinene, kambe a tirhisa matimba ya tipolitiki ku tshikelela marito ni swivilelo swa vaaki, kambe va tiyisisile leswaku va ta seketela vaaki eka swirilo hinkwaswo swa vona.