Maphorisa ya ta Macha ku vuyisa Xindzhuti

Hi Themba Chauke

Nhlangano wo yimela maphorisa na vatirhi va le makhotsweni lowu tivekaka hi POPCRU, wu ta va wu endla migingiriko yo macha lowu kongomisiweke eka ku vuyisela xindzhuti tanihi pfhumba leri ya ka emahlweni ro sirhelela tifanelo ta vatirhi, ku sirhelela xindzhuti eka xiyenge xa vululami, xikan’we na ku koxa leswaku ku tekiwa goza ehenhla ntshikelelo lowu khumbaka swirho swa vona eka Xiyenge xa Xiphorisa xa Tiko xikan’we na le Makhotsweni.

Leswi swi ta endzhaku ka swihehlo swo hlaya swa matikhomelo yo biha ku katsa na ku xanisa hi timhaka ta masangu eka tindhawu ta vuleteri bya maphorisa na le mitirhweni hi ku angarhela. Muvulavuleri wa POPCRU, Richard Mamabolo, u vurile leswaku tanihi nhlangano lowu wu yimelaka vatirhi eka xiyenge xa vululami, va tiyisisa ku tinyiketela loku ku nga tsekatsekiki eka ku sirhelela tifanelo, vuhlayiseki na xindzhuti xa swirho swa vona. “Hi sola swinene maendlelo hinkwawo yo xanisa hi timhaka ta masangu emitirhweni,” Mamabolo wa hlamusela.

Mamabolo u vurile leswaku ku xanisa hi timhaka ta masangu i ku tlula tifanelo ta ximunhu ka le henhla xikan’we na ku xanisa vanhu hi ku tirhisa matimba. “Leswi swi tekela ehansi tindhawu ta le mitirhweni, swi heta matimba, xikan’we na ku sivela ku tirha hi ku hetiseka ka swiyenge swa hina. POPCRU yi vona maendlelo lawa tanihi maendlelo lama nga amukelekiki, swi nga ri na mhaka leswaku munhu u le ka xiyimo xihi xa ntirho,” u ya emahlweni.

Nhlangano wa POPCRU wu tlhela wu kombela swirho hinkwaswo swa vona na vaaki
lava khumbekaka ku yima hi nomo wun’we eka mhaka leyi ku koxa ku byara vutihlamuleri, ku cinca na ku hlonipha xindzhuti xa maphorisa na vatirhi va le makhotsweni. Siku ro macha ri kunguhatiwile hi ndlela leyi; Ku ta va Ravumbirhi wa ti 24 Khotavuxika 2025 ku sukela hi awara ya nhungu nimixo.

Ku ta hlanganiwa epakini ya vaaki ya Burgers ePretori ku kongomiwa eka muako wa Shorburg, 429 xitarata xa Helen Joseph, ePretori. Xikongomelo i ku nyika Papila ra Swikoxo eka Khomixinara wa Maphorisa ya Tiko. Pursedende wa POPCRU Thulani Ngwenya u ta va a ri xivulavurinkulu eka siku leri.