Khomixinara wa maphorisa a endzela eka Malamulele

Hi Mkateko Ndlovu

Meyara wa Masipala wa Collins Chabane mukhaselara Shadrack Maluleke a amukerile Khomixinara wa Maphorisa wa Xifundzankulu xa Limpopo, Lieutenant Jenerali Thembi Hadebe loyi a endzeleke eka Malamulele ku kuma vuxokoxoko bya timhangu ta vugevenga leswi swi katsaka ku khomiwa na ku pfaleriwa ka vaehleketeleriwa lava va welaka eka migingiriko ya vugevenga byo chavisa, ku katsa na ku phangha, ku pfinya na ku dlaya eka byin’wana.

Khomixinara wa maphorisa u bumabumerile ku tinyiketela loku ku nga tsekatsekiki na ntirhisano lowu wu kombisiweke hi swiyenge swo hambana-hambana swa maphorisa ya xifundzhatsongo xa Vhembe. U kombisile leswaku ku tinyiketela ka vona swa xihatla mayelana na madzolonga lawa ya nga kona eka Malamulele na le Thohoyandou swi tisile ntshamiseko eka tindhawu leti.

Hi nkarhi wa nhlengeletano Lieutenant Jenerali Hadebe u kombisile leswaku swin’wana swigevenga swimbirhi leswi swi khomiweke i vaaki va matiko-mambe lava nga riki na maphepha ya vutitivisi, lava ku nga Murisi Gadzirai na Calvin Knowledge Moyo (Sithole). Lava hi van’wana va swigevenga lava tinghenelerisaka eka timhaka ta vugevenga etindhawini leti naswona a va tivonakarisile emahlweni ka khoto ya majistarata wa Thohoyandou hi Ravumbirhi wa ti 17 Khotavuxika 2025.

Ku vuriwa leswaku enkarhini wa sweswi lava vambirhi va tlheriseriwe ekhotsweni ra maphorisa, laha nandzu wa vona wu hundziseriweke emahlweni ku ya fika hi ti 24 Khotavuxika 2025 ku endla vulavisisi byin’wana. Calvin Moyo, loyi a langutaneke na swihehlo swo dlaya, ku ringeta ku dlaya, ku tlula nawu wa vuhlapfa, ku va na nhundzu leyi ehleketeleriwaka leswaku i yo yiviwa, na swibamu na swibuluki swo pfumala maphepha, u tsandzekile ku tivonakarisa ekhoto hikokwalaho ka ku va a ri exibedlele naswona u le ehansi ka vurindzi bya maphorisa.

Ku khomiwa loku ku huma eka ntirho wa matimba lowu endliweke eThohoyandou laha maphorisa ya nga khoma vaehleketeriwa hi nkarhi wa ku baleselana loku a ku ri kona eMakwarela. Hi nkarhi wa ku baleselana, vaehleketeleriwa vambirhi lava va katsaka un’we wa malembe ya 36 na un’we wa malembe ya 30 va baleseriwile va vaviseka swinene. Hi Sonto wa ti 15 ta Khotavuxika 2025 ku khomiwile muehleketeleriwa wa vunharhu eMusina, loyi a kumiweke a ri na xibamu na swibuluki swo pfumala maphepha.

Kasi muehleketeleriwa wa Vumune u khomiwile eMakwarela laha a hehliwaka hi milandzu leyi fambelanaka na tinhundzu leti yiviweke na ku phanga emakaya. Eka pfhumba leri, ku kumiwile swibamu Swinharhu swo pfumala maphepha, leswi hlanghanisiwaka na milandzu ya vugevenga ya Nhungu, xikan’we no kuma switirhisiwa swa nkoka swo fana na Mune wa tilaptop, 12 wa tiqingo, swibamu Swimbirhi swa ti pellet, 37 wa swibamu swa 9mm, na thelevhixini.