Kereke ya ZCC Yi Vilerisiwa Hi ZCC Yintshwa

Hi Themba Chauke

Kereke ya Siyoni leyi tivekaka hi Zion Christian Church (ZCC) yi velerisiwa hi hungu ra mavunwa leri hangalakaka na swiyenge swa mabulo hi murhangeri wa kereke ya siyoni leyi vitaniwaka Zion Creationist Church (ZCC) hi Michael Kgotso Serepo na valandzeri va yena lava vulaka leswaku Serepo i n’wana wa murhangeri wa ZCC Bishop Dokodela B.E Lekganyane. Serepo na valandzeri va yena va vula leswaku ZCC ya vona i xiphemu naswona yi na vuxaka na ZCC ya ka Lekganyane.

Muvulavuleri wa kereke ya ZCC ya ka Lekganyane, Moatshe Ngoepe, u andlarile mhaka leyi a kombisa leswaku ZCC ya Lekganyane a yi tshamanga hi mavoko hi mhaka leyi, yi tekile voka ra nawu ku yimisa maendlelo ya Serepo. Hi siku ra 10 Khotavuxika 2024, ZCC ya Lekganyane yi kumile xileriso xa le khoto lexi sivelaka Serepo na valandzeri va yena ku endla leswi landzelaka:

Ku ambala yunifomo ya vukhongeri, swikoweto na switirhisiwa swa ZCC ku katsa na le ka tihlengeletano; Ku famba va byela vaaki leswaku i swirho swa kereke ya ZCC na ku vula leswaku va na vuxaka na kereke ya ZCC; Ku famba va byela vanhu leswaku Serepo i n’wana wa jaha wa Lekganyane. Ku vuriwa leswaku Serepo u lerisiwile ku tshika ku tirhisa vito ra Maditobane Barnabas Lekganyane hikuva u tirhisa vito leri ku hembela vaaki a vula leswaku i n’wana wa Lekganyane.

Khoto yi tlherile yi lerisa Ndzawulo ya Xikaya ku sula pasi ra Serepo leri nga na vito ra Maditobane Barnabas Lekganyane. Serepo u nyikiwile xileriso kusuka eka Ndzawulo ya xikaya xa leswaku pasi rakwe ra Moditobane Barnabas Lekganyane ri ta suriwa hikuva a nyikile vumbhoni byo hemba loko a endla xikombelo xa pasi leri a vula leswaku i n’wana wa Lekganyane ku nga ri ntiyiso. Serepo u tlherile a byeriwa leswaku maendlelo lawa ya khomisa kumbe ku hakela ndziho.

Kasi endzhaku ka ku tsandzeka ku ntlhotlha xileriso lexi, hi siku ra 31 Mhawuri 2024, pasi ra Serepo ra mavito ya Maditobane Barnabas Lekganyane ri suriwile. Ku tlhelaku vuriwa leswaku ehandle ka xileriso xa khoto, Serepo u ya emahlweni a hangalasa mahungu ya mavunwa eka swiyenge swa mabulo swa facebook leswaku wa ha tivitana Maditobane Barnabas Lekganyane a vula leswaku a ku cincanga nchumu eka Ndzawulo ya Xikaya. Hi siku ra 05 Khotavuxika 2025, Khoto yi lerisile Xerifu wa khoto ku ya hlayela Serepo na kereke yakwe xileriso xa khoto kambe a swi kotekalanga hikuva u siveriwile hi swirho swa kereke ya Serepo. Enkarhini wa sweswi Kereke ya ZCC ya ka Lekganyane yi yisile mhaka leyi ekhoto ya le Henhla ku kuma xintshuxo hi mhaka leyi.