Ndzawulo yi Vilerisiwa Hi Hungu ra Mavunwa ra Swibedlele

Hi Themba Chauke

Ndzawulo ya Rihanyo ya Xifundzhankulu xa Limpopo, yi vilerisiwa hi mikandziyiso ya khale ya tivhidiyo leyi yi hangalakaka na swiyenge swa mabulo swo fana na Tik-Tok, leswi tekiwaka tanihi xiyimo xa sweswi eka tindhawu ta vutshunguri ta mfumo. Ku vuriwa leswaku mikandziyiso ya tivhidiyo leti ta khale i ya le swibedlele swa Elim na Nkhensani.

Muvulavuleri wa Ndzawulo ya Rihanyo Neil Shikwambana, u vurile leswaku tivhidiyo ti tisa nchavo lowu nga lavekiki eka vanhu, ti tisa mavonelo yo biha eka vaaki, xikan’we na ku tekela ehansi ntirho wo tinyiketela wa vatirhi va xiyenge xa vutshunguri. “Hi hlohlotela vaaki leswaku va va na vuxiya-xiya, na ku tiyisisa vuxokoxoko va nga se byi hangalasa, ngopfu-ngopfu eka swiyenge swa mabulo leswi swi hangalasaka hungu hi xihatla,” ku vula Shikwambana.

U yile emahlweni a vula leswaku ndzawulo yi tinyiketerile ku yisa emahlweni antswiso wa vukorhokeri bya vutshunguri hi ndlela leyi yi nga le rivaleni. U komberile vaaki ku landzelela tindlela ta ndzawulo ta vuhlanganisi ku kuma vuxokoxoko bya ntiyiso bya tindhawu ta vutshunguri.

“Ku hangalaka ka mahungu ya mavunwa a swi onhi ntsena ndzhuti wa xiyenge xa rihanyo, swi tlhela swi endla leswaku vaaki va pfumala ntshembho xikan’we na ku heta matimba eka vavabyi ku kuma vutshunguri lebyi va byi lavaka. A hi tirheni swin’we ku sirhelela ndzhuti wa tindhawu ta hina ta vutshunguri hi ku ala ku tinghenelerisa eka ku hangalasa mahungu ya mavunwa,” wa gimeta