Vabi va Xibakela va vangama eka ntlango wa Xibakela

Themba Chauke

Ntlawa wa vabi va xibakela lavantsongo lava tshembhisaka kusuka eGiyani, lava dzaberiwaka hi mudzabi wa xisati, Xirhuli Mbungele, va endle ku sungula loku tshameke swinene eka ntlango wa xibakela lowu lulamisiweke hi Nhlangano wa ntlango wa xibakela  wa Namakgale ku ya eka Malamulele.

Vabi va xibakela lava va mune, va katsa; Rivoningo Baloyi, Ntwanano Chabalala, Mufiri Mabasa, na Evidence Ngobeni naswona hinkwavo ka vona va hlurile va kuma timendlele ta nsuku na switifikheti. Endzhaku ka ntlango, mudzaberi Mbungele u kombisile ku tinyungubyisa swinene hi ndlela leyi vana vakwe va dyondzisiweke ha yona, a vula leswaku va hundzile leswi a swi languteriwile, ngopfu-ngopfu hikwalaho ka leswi a ku ri ro sungula ku hlula.

Mbungele u hlamuserile leswaku ku nghena eka ringi ro sungula i nchumu lowu endlaka swo tala eka vabi va xibakela lavantshwa, vo tala va khomiwa hi tingana ni ntshikilelo wa ku hlaleriwa hi vanhu hi nkarhi walowo. Hambiswiritano, vana vakwe va kombisile ku tiyimisela, ku kongomela, na moya wa ku lwela ntamu hilaha ntlango hinkwawo wu fambeke ha kona, leswi a swi kombisa ntshembo wa vona eka ntlango lowu.

“Hinkwavo va hlulrile eka mitlangu ya vona, naswona hikokwalaho ka ntlango wo sungula, ndzi nga vula leswaku va tirhile kahle ngopfu. Ku ni tindhawu leti hi faneleke ku ti antswisa, ngopfu-ngopfu eka ku twisisa kahle vunghana bya vona, kambe hi ku angarhela ndzi tinyungubyisa hi leswi va swi fikeleleke,” ku vula Mbungele.

Murhumiwa Mbungele, hi un’wana wa vadzaberi va xisati va ntlango wa xibakele eka xifundzhankulu, u dzunisile na ntirho wo tshembeka ni xichavo lexi vana vakwe va xi kombisaka hi nkarhi wa ku leteriwa. “Hambileswi ndzi nga wansati, va ndzi kombisa xichavo xa le henhla hi masiku ni minkarhi tanihi murhumiwa wa vona. Ku tinyiketela ka vona eka ku leteriwa i ka nkoka ngopfu, naswona ndzi pfumela leswaku va nga ya emahlweni swinene eka ntlango lowu,” wa gimeta.