Nghozi eGondzweni ra R101 yi Koxa Ntsevu wa Vutomi

Hi Themba Chauke

MEC wa Vutleketli na Vuhlayiseki bya Vaaki, manana Susane Mathye, u vilerisiwa swinene hi nghozi ya mahlomulambilu leyi yi humeleleke egondzweni ra R101, exikarhi ka Mokopane na Mookgophong, ehansi ka xifundzhantsongo xa Waterberg. Nghozi leyi yo chavisa yi humelerile exikarhi ka lori na movha wa maphorisa naswona yi koxile vutomi bya vanhu va Ntsevu, lava katsaka phorisa rin’we xikan’we na vabohiwa vantlhanu lava a va yimerile ku tenga.

MEC Mathye, u yisile marito yo chavelela eka mindyangu ya vafi. “Hi tlhela hi rhumela marito yo chavelela eka lava va vavisekeke, naswona hi va navelela leswaku va hola hi xihatla,” ku vula MEC. Ku vuriwa leswaku eka nghozi leyi, ntsevu wa vanhu va vavisekile, laha vanharhu va yisiweke exibedlele xa HF Odendaal eModimolle, un’we u rhwaliwile hi xihahampfhuka ku ya exibedlele xa Polokwane, kasi vambirhi va yisiwile exibedlele xa Voortrekker eMokopane.

Xivangelo xa mhangu xa ha ri ku lavisisiweni, naswona ku komberiwa vanhu hinkwavo lava va khumbhekaka ku va na vukheta na ku lehisa timbilu loko vulavisisi byi ya emahlweni. MEC u kombisile leswaku Ndzawulo ya Vutleketli na Vuhlayiseki bya Vaaki, yi ta tirhisana na swiyenge swa nawu ku vona leswaku magondzo ya xifundzhankulu ya hlayisekile eka vatirhisi hinkwavo. “Hi kombela vachayeri ku chayela hi vukheta na ku landzelela milawu ya vuhlayiseki bya le magondzweni ku sivela timhangu leti fanaka enkarhini lowu taka. Mimoya ya lava va hundzeke emisaveni a yi etlele hi kurhula, naswona hi kombela ku kuma matimba endzhaku ka mhangu leyi,” ku gimeta MEC. Endzhaku ka mhangu leyi, gondzo a ri pfariwile hikokwalaho ka ku chavisa ka mhangu, kambe enkarhini wa sweswi gondzo ri pfuriwile.