Giyani Atletico Yi Hlula

Hi Mutsari wa Hina

Eka ntlango lowu a wu languteka wu voyamela etlhelo rin’we kusukela loko mpepe yi ba, Xipano xa Vaxisati xa Giyani Atletico, xi kotile ku hlula hi ti golo ta 4-2 ehenhla ka xipano xa Vaxisati xa Matsotsosela, eka mphikizano wa Mayor’s Cup erivaleni ra mitlangu ra Giyani hi Mugqivela.

Xipano xa Atletico xi sungurile hi ku gonya ntshava, endzhaku ka loko n’watipala a endlile xihoxo lexi endleke leswaku xipano lexi a va phikizana na xona xi howisa golo ta ha suka. Vahlaleri va kombisile leswaku xipano xa Atletico a xi nge he vuyi, tanihileswi xipano a xi tikomba xi tsekatseka eka vusirheleri bya n’watipala.

Hambiswiritano, eka xiphemu xa vumbirhi, xipano xi kombisile moya wo lwa, leswi nga tisa ntshembho wa xidlodlo eka mphikizano lowu. Xipano xi sungurile ku rhumela hinkwaswo leswi a xi ri na swona laha a xi hlasela xi kombisa leswaku nyimpi leyi a yi nge heli ntsena. Vatlangi va le xikarhi va timurile malangavi ya vatlangi va Matsotsosela, loko vatlangi va le mahlweni va hlasela xipano xa Matsotsosela bya tinyoxi, leswi endleke leswaku vahlaleri va yima hi swikunwana.

Xipano xa Matsotsosela lexi a xi dya byi rhelela eka xiphemu xo sungula, xi tikumile xi ri ehansi ka ntshikelelo eka xiphemu xa vumbirhi hikuva a xi tsandzeka ku angula eka matlangelo ya Atletico. Loko n’watipepe a ba mpepe ro hetelela, xipano xa Atletico a xi hlurile ntlango hi 4-2, leswi endlaka leswaku xi wela eka swipano swa mune leswi swi nga sala ku ya lwela xidlodlo xa mphikizano wa Mayor’s Cup eka xiyenge xa vaxisati.

Loko a vulavula endzhaku ka ntlango, mudzaberi wa xipano xa Atletico, Hlawu Ndlovu u vurile leswaku ntlango lowu wu va dyondzisile dyondzo leyi a va nga yi tekeli enhlokweni, naswona va ta tirha hi matimba ku lulamisa swihoxo swa vona eka ntlango lowutaka. U amukerile leswaku xipano xi na swiphiqo xa n’watipala leswi va nga ta swi lulamisa.

“Emasunguleni, a hi nga swi tekeli enhlokweni leswaku hi na swiphiqo xa n’watipala, hikuva a hi nga se tshama hi hlangana na xipano lexi a xi rhumela tibolo eka n’watipala. Kambe namuntlha hi hlanganile na xipano lexi a xi rhumela tibolo hi ku kongoma, naswona leswi a swi lava ku hi tekela ntlango,” ku vula Ndlovu.

Loko a vutisiwa leswaku u ta enetisiwa hi ntsengo wa R19, 000, wa swipano leswi nga ta lahlekeriwa eka ntlango lowutaka, Ndlovu u kombisile leswaku ku ta va ku nga ri mbuyelo wo biha swinene, kambe u vurile leswaku xipano xakwe xi tlhomile tihlo eka ntsengo wa R55 000. “Swona swi ta va swi nga bihanga ngopfu, hikuva njiya a yi fani na muroho, kambe xivono xa hina i ku kuma ntsengo wa xidlodlo, ehandle ka swin’wana,” wa gimeta.