Xifundzhankulu xi Vilerisiwa hi ku Dlawa ka Vavasati

Hi Themba Chauke

Vurhangeri bya xifundzhankulu xa Limpopo a byi khomile nhlengeletano yo hlawuleka hi siku ra 13 Mhawuri 2025, ku amukela xiviko xa nkoka kusuka eka maphorisa ya tiko ra Afrika-Dzonga na Ndzawulo ya Rihanyo ku landzela timhangu to hlaya ta madzolonga ya rimbewu na ku dlawa ka vanhu hi xikongomelo xo endla mimirhi exifundzhenintsongo xa Vhembe.

Vurhangeri byi kombisile ku vilela swinene hikokwalaho ka maendlelo lawa, ngopfu-ngopfu timhangu leti ti humelelaka eka mindyangu na maxaka. Kasi lexi vavisaka ngopfu, hi leswaku timhangu to tala ti humelela exikarhi ka vatswari na varhandzani lava vavisanaka swinene.

Xikombiso xin’wana xa mahlomulambilu i mhangu ya phorisa leri dlayeke murhandzani wa rona eka masipala wa Collins Chabane hi ku n’wi balesela hi xibamu. Mhangu leyi yi landzeriwile hi madzolonga ya vaaki lava va tekeke nawu va wu veka emavokweni ya vona.

Holobyenkulu wa xifundzhankulu xa Limpopo Dokodela Phophi Ramathuba u vurile leswaku vurhangeri byi swi tekela enhlokweni leswaku hambileswi ku vonakala ka maphorisa swi nga kona ku langutisisa timhangu ta muxaka lowu, leswi a swi nge lulamisi timitsu ta swiphoqo leswi swi humelelaka emakaya na le ka vuxaka bya vanhu. “Swi na nkoka leswaku hi rhangisa emahlweni ku hola ka vaaki na nseketelo wo tiya eka maendlelo lawa,” ku vula Holobyenkulu.

Vurhangeri byi kombisile leswaku swi na nkoka ku seketela hi ku hetiseka makungu lama nga kona yo tihlanganisa na vaaki lama lulamisiweke hi Ndzawulo ya Vutleketli na Vuhlayiseki bya Vaaki, hi ku tirhisana na maphorisa ya tiko lama lulamisiweke kwala ku fambeni ka n’hweti. Mapfhumba lawa ya languteriwa ku kondletela ntirhisano exikarhi ka vaaki.

Vurhangeri byi vilerisiwa swinene hi switandzhaku swa madzolonga lawa eka vana, laha va bumabumaleke leswaku ku fanele kuva na makungu yo seketela vana lava nga le ka xiyimo xo ka xi nga ri kahle. Ku fikelela leswi va vula leswaku va ta tirhisana na tinánga ta xinto, tihosi, vafundhisi na mihlangano ya vaaki ku tiyisisa nseketelo wo hetiseka wo tshungula.

“Hi kombela swirho hinkwaswo swa vaaki ku hlangana na hina loko hi kondletela ndzhavuko wa ntwelavusiwana, nseketelo na ku twisisana loko hi ya emahlweni hi tirha swin’we ku lwisana na madzolonga ya rimbewu, na switandzhaku swa wona swo biha eka miganga ya hina,” Ku gimeta Holobyenkulu.