TTM Yi nga ha Nghena eka Nedbank

Hi Themba Chauke

Rendzo ro kongoma eka mphikizano wo hlawuleka wa Nebank Cup, ri sungurile ximfumo eka swipano swa ligi ya ABC Motsepe eLimpopo, tanihleswi swipano swa mune leswi swi lavaka ku fikelela mphikizano lowu swi lwelaka ku ya yimela xifundzhankulu eka mphikizano.

Mphikizano wa Nedbank Cup, lowu wu fananisiwaka na Mphikizano wa FA Cup, wu hlanganisa swipano swa 32, laha 16 swi humaka eka PSL, 8 swi huma eka NFD, xikan’we na 8 leswi swi sukaka eka Ligi ya ABC Motsepe, ku ya lwela timiliyoni ta tirhandi xikan’we na kuva tinhenha ta mphikizano.

Kuva swipano swa le hansi swi tikuma swi nghena eka mphikizano lowu, swi vula nkateko wa kahle wo avelana xiteji na swipano swikulu swo fana na Mamelodi Sundowns, Orlando Pirates, xikan’we na Kaizer Chiefs eka swin’wana. Kasi kuva xipano xi ta kota ku nghenela mphikizano, xi tiyisisiwa ku tikumela ntsengo wa R280 000.

Swipano leswi swi nga le ka xitirimu xa A, a swi katsa Mukondeni Young Chiefs, Tzaneen United, Tshakuma Tsha Madzivhandila (TTM), xikan’we na Vondwe XI Bullets, naswona swipano leswi swi tlangile rhengu ro sungula ro phikizana ku ya nghena eka mphikizano wa swipano swa 32 swa Nedbank Cup.

Eka mitlangu yo sungula, Mukondeni Young Chiefs yi hundzerile eka rhengu leri landzelaka endzhaku ka kuhlula xipano xa Tzaneen United hi 1-0 eka ntlango lowu a wu bohanile swinene. Tlangelo ra vatlangi va vona va le ndzhaku xikan’we na vatlangi va le xikarhi swi va pfunile ku sivela xipano xa Tzaneen United ku howisa.

Hambiswiritano, ntsako wa vona wu vile wa xinkadyana endzhaku ka loko va ta va va hlanganile na xipano xa TTM eka rhengu ro hetelela. Xipano xa TTM xi ponile eka ntlango wa vona wo sungula endzhaku ka ku tlanga ku ringana na xipano xa Vondwe XI Bullets hi 1-1 laha va nga hlula eka tiphenati hi 5-4, xikan’we na ku hlula xipano xa Young Chiefs eka rhengu ro hetelela hi 1-0.

Hambileswi mbuyelo wu fambeleke eka tlhelo ra vona, matlangelo ya vona a ma tsakisi na swintsongo. Leswi swi endlile leswaku va soriwa hi vaseketeri laha vanhu va nga tivutisa loko xipano xi lulamerile ku ya phikizana eka mphikizano wa xiyimo xa le henhla wa Nedbank Cup.

Mitlangu leyi yi tlangiweke eGiyani, a yi kombisanga matlangelo lama swipano leswi swi lwelaka ku nghena eka mphikizano wa Nedbank Cup. Kuhlula ka TTM a swi taleriwile hi swisolo endzhaku ka loko va hlurile hikokwalaho ka xihoxo lexi xi endliweke hi n’watipala.

Leswi swi ta endzhaku ka loko n’watipala wa Mukondeni Young Chiefs a tsandzekile ku sivela bolo leyi yi nga ba pala kutani a wela ehenhla ka yona endzhaku ka ntila kutani n’watipepe a teka xiboho xa leswaku yi korile. Xipano xa TTM a xi nga kombisi nkhikhi, tanihileswi xipano lexi a xi tlanga hi ku tiyimisela a ku ri xipano lexi a va tlanga na xona.

 “Lexi a hi xipano lexi munhu a faneleke ku xi tshembha,” ku vula un’wana wa vaseketeri, endzhaku ka matlangelo ya xipano lama kombiseke leswaku xi hlurile hikokwalaho ka nkateko ku nga ri matlangelo lama enetisaka. Hambiswiritano vuswikoti bya TTM byo kota ku kuma mbuyelo hambi swi nga tshembisi swi nga ha yisa xipano ekule.

Endzhaku ka kuhlula eka Xitirimu xa A, TTM yi languteriwa ku ya hlangana na vahluri eka xitirimu xa B naswona xipano lexi xi nga ta hlula xi ta ya yimela xifundzhankulu xa Limpopo eka Mphikizano wa Nedbank Cup.

Hambileswi matlangelo ma TTM ma nga tshembhisiki, matimu ya kombisa leswaku swipano swo fana na leswi swi tlanga hi ku tiyimisela loko swi fikile eka Nebank Cup, laha swipano swa le hansi swi toloveleke ku hlula swipano swikulu. Ku ri TTM yi nga ha swikota ku endla matimu lawa swi ta tikomba loko xo fikelela mphikizano lowu.

Enkarhini wa sweswi, xin’wana lexi xi nga le rivaleni, rendzo wa swipano swa le Limpopo ku fikelela mphikizano ri ya emahlweni. Milorho ya TTM yo titivisa ya ha hanya, hambileswi matlangelo ma tsekatsekaka. Kasi siku ro tlanga ntlango lowu wu nga ta teka xipano ku ya eka mphikizano wa Nedbank Cup a ri se tivisiwa.