MPAC YI LAVA KU HERISA TIKONTIRAKA

Hi Themba Chauke

Mutshamaxitulu wa Komiti ya Xibalo xa Mfumo xa Masipala (MPAC), Eric Makondo, u lava leswaku masipala wa Giyani wu yima ku thola tikhamphani ku lema magoji-goji ya switarata swa le ka masipala, a vula leswaku a va pfuni nchumu.” U vurile leswaku masipala wu fanele ku teka vutihlamuleri bya ntirho lowu ku hunguta tihakelo na ku tiyisisa vukorhokeri byo antswa.

Makondo a vulavula hi nkarhi wa ntshamo wa huvo ya masipala wa vumune, lowu a wu khomeriwile eHolweni ya Vaaki ya Giyani. Loko a nyika xiviko xa MPAC, u kombisile ku tirhisiwa ka vaphakeri va vukorhokeri tanihi mhaka leyi yi nga hlayisiki mali, a kombisa leswaku mitirho ya vona i ya xiyimo xa le hansi.

“MPAC yi vilerisiwa hi xiyimo xa mapatu lama lemiweke hi vaphakeri va vukorhokeri eGiyani,” u byela huvo. U vurile leswaku komiti yi endzerile mapatu mo hlaya lama onhakeke, ku katsa na lama ma nga le D2, Kremetart, na le Giyani a ti-A, va kuma leswaku xiyimo xa wona a xi tsakisi na kantsongo.

 “Eka tin’wana timhangu, hi kumile leswaku tin’wana tindhawu leti ti lemiweke ti siyiwile ti nga tshamisekanga, loko ku na mpfula, mati ma tala endhawini ya kona, leswi swi tlhelaka swi endla xigojana ehenhla ka xigojana xa khale,” ku hlamusela mutshamaxitulu wa komiti.

“Hi kumile leswaku ku tirhisiwa ka vaphakeri va vukorhokeri a swi hlayisi mali. Masipala wu nga endla swo antswa hi ku tirhisa vatirhi va masipala. Hikokwalaho ka leswi, MPAC yi bumabumela leswaku enkarhini lowu taka, masipala wu fanele ku herisa tikontiraka to lema magoji-goji,” wa hlamusela.

Loko mukhaselara Tiyani Rabothata a vutisa loko ku ri na nawu eka mafambiselo ya masipala lowu wu swi vekaka erivaleni ku sivela ku tirhisiwa ka van’watikontiraka, Makondo u angurile a vula leswaku swibumabumelo swa vona a swi endliwanga hi ku kongomisiwa eka milawu. U vurile leswaku leswi swi ta endzhaku ka mavonelo xikan’we na swikambelo swa komiti hi vukorhokeri lebyi byi nyikiwaka hi vaphakeri va vukorhokeri.

“Eka leswi hi swi voneke na ku swi kambela, a hi voni ku vuyeriwa ka masipala eka mali leyi yi tirhisiwaka ku thola ku endla vukorhokeri lebyi,” Makondo wa hlamusela. “Swa durha, naswona ntirho lowu wu endliwaka hi van’watikontiraka lava i wa xiyimo xa le hansi swinene, hi nga mi teka hi famba na n’wina hi ya mi komba maendlelo ya le hansi yo lema mapatu yo hlaya etindhawini leti hi ti kambeleke,” u ya emahlweni.

“Hi ku vona ka hina, vatirhi va ka masipala va na byona vuswikoti byo endla ntirho lowu hi ku hetiseka naswona hi ntsengo wa le hansi ku tlula lowu ku hakeriwaka mali yo hlaya hi ku thola vaphakeri va vukorhokeri va le handle lava va tsandzekaka ku endla ntirho lowu wu lavekaka.”

Swibumabumelo swa MPAC, swi ta endzhaku ka loko switarata swo tala elokixini ra D2 na le ti-A, swi taleriwile hi ku lemiwa ka magoji-goji ka xiyimo xa le hansi, laha swin’wana swi bohekaka ku tlhela swi lemiwa nakambe nkarhi wun’wana na wun’wana loko ku na mpfula, hikokwalaho ka leswaku van’watikontiraka lava va thoriweke ku swi lunghisa va endlile hi mavomu ku endla ntirho wa xiyimo xa le hansi ku hunguta tihakelo, kumbe va pfumala vuswikoti lebyi byi lavekaka ku endla ntirho hi ku hetiseka.

Ends