MEYARA A TSHINYA VAKAVANYETI

Hi Themba Chauke

Meyara wa Giyani, Thandi Zitha u lemukisile munhu un’wana na un’wana loyi a nga xiphemu xa mitlawa ya vanhu lava va nga na xikongomelo xo kavanyeta migingiriko ya vumaki eYunivhesithi ya Thekinoloji ya Tshwane (TUT) eGiyani, leyi ku kunguhatiweke leswaku yi ta pfuriwa hi Sunguti lembe leri taka. U vurile leswaku maendlelo yo kavanyeta a ma nge pfumeleriwi.

Zitha a nyika lemukiso lowu eka nhlengeletano wo tihlanganisa na vaaki lowu a wu khomeriwile ekerekeni ya Philadephia eChurch View eGiyani. Ntirho lowu a wu endliwile hi xikongomelo xo tivisa vaaki hi ntirho lowu wu nga le ku endliweni wo antswisa vumaki bya TUT eGiyani, xikan’we na ku nyika vaaki nkateko wo vutisa swivutiso hi mafambelo ya ntirho lowu.

 “Kusukela loko khale ka Holobye Blade Nzimande a tivisile leswaku yunivhesithi yi ta pfula eGiyani, doroba ri taleriwile hi nyanyuko xikan’we na migingiriko ya ikhonomi,” ku hlamusela meyara. “Jikajikisano wa namuntlha wu kombisa masungulo ya rendzo lerikulu leri ri nga ta tisa mikateko ya dyondzo eka vanhu va ka hina. Hikokwalaho hi hlohlotela swichudeni leswi swi nga ta yisa tidyondzo emahlweni ku teka nkateko wa TUT eGiyani,”

U vurile leswaku ku tumbuluxiwa ka rhavi leri a swi nge vuyerisi ntsena vaaki va le Giyani, kambe na timasipala leti ti nga le ka xifundzhantsongo xa Mopani xikan’we na xifundzhankulu hi ku angarhela, leswi swi nga ta tlakusa migingiriko ya ikhonomi xikan’we na ku antswisa ku fikelela timhaka ta tidyondzo ta le henhla.

Zitha u komberile tihosi, swiyenge swa vaaki, xikan’we na vaaki ku tirha swin’we ku tiyisisa leswaku phurojeke ya humelela. U komberile vaaki ku langutisa na leswi swi nga ta va kona ehandle ka vumaki ntsena, xikan’we na ku vuyeriwa ka vaaki eka tidyondzo na swin’wana leswi swi nga ta humelela hikokwalaho ka Yunivhesithi.

U amukerile leswaku vaaki vo hlaya va lava ku tiva hi swivandla swa mitirho eka phurojeke leyi. “Tanihi masipala, hi lava leswaku matholelo ma nga voyameli etlhelo rin’we, naswona tiwadi hinkwato ta le Giyani ti fanele ku vuyeriwa swi nga ri na mhaka hi mpfhuka,” wa hlamusela.

U lemukisile hi vanhu lava va tumbuluxaka mitlawa ya vaaki va vula leswaku va yimela swivilelo swa vaaki, loko xikongomelo xa vona ku ri ku tirhisa phurojeke leyi ku tivuyerisa.

“Ku na maendlelo lama tlakukaka laha vanhu va tumbuluxaka tiforamu ta vaaki hi xikongomelo xo lava ku tivuyerisa. Swona i mfanelo ya vanhu ku ya hi vumbiwa ku tumbuluxa tiforamu, a hi nge pfumeleli leswaku leswi swi tirhisiwa ku sivela nhluvuko hi ku tirhisa miganga ya hina,” wa engetela.

 “Hi lava ku swi veka erivaleni hi nga tipfinyingi leswaku un’wana na un’wana loyi a nga na makungu yo kavanyeta nhluvuko hi nkarhi wa ku antswisiwa ka rhavi leri, u fanele ku tekeriwa magoza, naswona voko ra nawu ri fanele ku tirha,” u ya emahlweni laha a kombeleke lava va nga na ku tsakela ku endla mabindzu na yunivhesithi ku tiyisisa leswaku maendlelo ya vona ya lendzelela milawu na maendlelo ya matholelo ya yunivhesithi.

Marito ya meyara ya seketeriwile hi Hosi Homu, loyi a tiyisiseke nkoka wa ku pfuriwa ka TUT eGiyani leswaku vaaki va ta vuyeriwa, a tekela enhlokweni rendzo ro leha na ku tika ku kota ku fikelela yunivhesithi endhawini leyi.

“Van’wana va nga tsundzuka leswaku a hi vanhu hinkwavo lava a va tsakile loko yunivhesithi yi tiyisisiwa. Van’wana va tekile mhaka leyi va yi yisa na le tikhoto ku sivela leswaku yi tumbuluxiwa. Loko hi sungula hi mahanyelo yo kavanyeta, hi nga lahlekeriwa hi nkateko lowu wa ku kuma yunivhesithi ekaya,” wa lemukisa, loko vanhu va n’wi bela mavoko yo n’wi seketela.