WANHWANA A HLAWURIWA EKA CSA

Hi Themba Chauke

Murisi Rikhotso, nhwana wa malembe ya 16, kusuka elokixini ra le ti-F eGiyani, u hlawuriwile ku ya eka nkamba ya vaxisati ya Khirikhete eAfrika-Dzonga (CSA) leri ku nga pfhumba leri ri endleriweke ku letela vatlangi lavantsongo lava va nga ta yimela tiko ra Afrika-Dzonga eka mphikizano wa misava wa khirikhete hi lembe ra 2028.

Rendzo ra Rikhotso i nyiko, ku tinyiketela, xikan’we na ku navela, kusukela eka ku rhandza khirikhete a ha ri ntsongo. Loko a sungula ku tlanga khirikhete eGiyani Cricket Hub, a tshamela ro tsakisa vadzaberi na vatlangi kulobye hi vuswikoti na ku tinyiketela ka yena.

Ku tinyiketela ka yena swi endlile leswaku a tikumela xivandla eka xipano xa vaxisati xa CSA, leswi ku nga ku humelela ka le henhla eka munhu lontsongo. Sweswi a nga xiphemu xa CSA, xikongomelo xa yena i ku ya yimela tiko ra Afrika-Dzonga eka mphikizano wa misava hi lembe ra 2028, ku nga ri ntsena ku phikizana eka xiyimo xa le henhla, kambe na ku hlohlotela vatlangi lavantsongo laha a humaka kona.

Kuya hi mudzaberi wa yena eka Giyani Cricket Hub, Dingani Mathonsi, ku hlawuriwa ka Rikhotso i mbuyelo wa matirhelo ya yena yo enetiseka hi nkarhi wa vhiki ra Khirikhete ya Afrika-Dzonga lowu a wu khomeriwile eka xifundzhankulu xa Gauteng lembe leri hundzeke. “Murisi u tlangile swinene ngopfu hi nkarhi wa ntirho lowu, naswona u tekeriwile enhlokweni ehenhla ka vatlangi lava va nga na nyiko swinene eka khirikhete,” wa hlamusela.

Tlangelo ra yena ri endlile leswaku a kuma xirhambo xa masiku mambirhi enkambeni wa khirikhete ePitori n’hweti leyi hundzeke, laha vuswikoti bya vatlangi byi kamberiwaka xikan’we na ku antswisiwa. Ku rhambiwa eka nkamba yoleyo swi vula leswaku mutlangi i xiphemu xa xipano xa CSA, lexi xi lulamiseriwaka ku ya tlanga eka mphikizano wa misava wa khirikhete hi lembe ra 2028.

 “U ta ya emahlweni a rhambiwa eka tikamba leti ti fanaka hi kuya hi mikarhi, loko vuswikoti bya yena bya ha laveka, ku fika hi lembe ra 2028, laha ku nga ta hlawuriwa xipano xo hetelela ku ya yimela tiko ra Afrika-Dzonga eka mphikizano wa misava,” Mathonsi wa hlamusela.

Rikhotso loyi a tlangelaka xipano xa Xifundzhankulu xa Limpopo, i mutlangi a ri yexe loyi a hlawuriweke ku ya eka nkamba ya CSA. “Hi tshembha leswaku u ta tirha kahle xikan’we na ku endla leswaku Limpopo yi tinyungubyisa hi yena loko nkarhi wa yena wo vangama wu fika,” Mathonsi u ya emahlweni.

Loko a kombisa ku tsaka ka yena, Rikhotso u vurile leswaku kuva xiphemu xa pfhumba leri i milorho leyi yi hundzukeke ntiyiso, naswona u tinyiketerile ku tirhisa nkarhi lowu. “Ndzi tsakile swinene ku nyikiwa nkateko wa leswaku ndzi nga ha tlanga eka mphikizano wa misava,” wa hlamusela.

“Leswi swi vula leswaku ndza kula, ngopfu-ngopfu loko ndzi tiva leswaku ndzi sungurile ku tlanga laha kaya eka Giyani Crikect Hub, kutani ndzi hlawuriwa ku ya tlanga eLimpopo, naswona sweswi ndzi tlangela xipano xa vaxisati xa CSA. Eka mina, leswi i ku humelela lokunkulu leswi un’wana na un’wana a nga navelaka ku swi fikelela.

Rikhotso u tshembha leswaku vuntshwa bya yena byi n’wi nyika nkateko ehenhla ka van’wana tanihileswi a yisaka emahlweni a antswisa vuswikoti bya yena. “Mphikizano wa tika swinene, ndza swi tiva, kambe tanihileswi ndzi nga lontsongo naswona ndzi na nkarhi wo hlaya wo antswisa vuswikoti bya mina, a ndzi voni ndzi ta tsandzeka ku fikelela eka xipano xo hetelela,” u ya emahlweni.

Eka Rikhotso, Khirikhete i yinkulu ku tlula ntlango, i ndlela yo cinca vutomi bya yena na ku hlayisa ndyangu wa ka vona. “Enkarhini wa sweswi xiyimo a xi tsakisi ekaya, naswona ndzi tshembhela eka ntlango ku va ndzi humelela tanihi mutlangi wa xisati, rin’wana ra masiku ndzi ta kota ku antswisa xiyimo xa le kaya,” wa gimeta.