HOSI YI VILERISIWA HI KU CERIWA KA SEKE

Hi Themba Chauke

Nkwetlembetano hi mhaka yo ceriwa ka seke exikarhi ka hosi na n’wamabindzu swi endlile leswaku ku va na nhlengeletano exikarhi ka Hosi Maswanganyi, na n’wini va khamphani ya switina ya Vahlave, David Maswanganyi, na khomandara wa xitichi xa maphorisa ya Giyani Brigadier Solomon Serakwana.

Nhlengeletano lowu a wu khomeriwile emugangeni wa ka Maswanganyi ku kuma xintshunxo eka mhaka leyi, laha ku hehliwaka leswaku tilori ta Vahlave ti rhwalela seke etindhawini ta ka Dzingidzingi swi nga ri enawini, na swona ndhawu leyi yi wela ehansi ka Vuhosi bya Mfumo Xivongo xa ka Maswanganyi.

Ku ya hi muvulavuleri wa yindlu ya Vuhosi bya ka Maswanganyi, Philip Baloyi, u vula leswaku mhaka leyi yi sukela loko Ndhuna Mashawu a mangarile tilori ta ka Vahlave leti a ti rhwalela seke etindhawini ta ka Dzingidzingi ehandle ka phomende, leswi endleke leswaku ti siveletiwa.

Baloyi u vule leswaku n’wamabindzu loyi a tivekaka swinene hi vito ra Vahlave, u fonerile Brigadier Serakwana, a vula leswaku tilori takwe ta siveletiwa swi nga ri enawini, leswaku ti nga hundzi hi le ka Dzingidzingi, hi nkarhi lowu a ti fambisa seke kusuka endhawini yin’wana ya ka Siyandhani laha a celaka kona.

Serakwana u endlile nhlengeletano exikarhi ka swiyenge leswimbirhi ku kuma ntiyiso. Hi nkarhi wa nhlengeletano, Vahlave u kanetile ku va a rhwalela seke eka Dzingidzingi laha a vuleke leswaku tilori takwe ti cela seke emugangeni wa ka Siyandhani.

Ku twananiwile leswaku ku endzeriwa ndhawu leyi ku vuriwaka leswaku ku ceriwa kona seke. Loko ku fikiwa endhawini ya kona, swi kumekile leswaku ndhawu leyi yi wela ehansi ka vulawuri bya ka Maswanganyi, ku nga ri muganga wa ka Siyandhani. “Hi kumile leswaku u teka tinxaka timbirhi ta leswi katsaka seke ra G5 na nsava ro aka,” kuvula Baloyi.

U yile emahlweni a vula leswaku va tlhele va kuma leswaku ku onhiwile swinene endhawini liya, leswi swi humeleleke va nga swi tivi. Kasi ku twananiwile leswaku n’wamabindzu u ta ya emahlweni a cela nsava endhawini liya, ntsena loko a landzelela swilaveko na ku hakela tihakelo leti lavekaka ku fana na man’wana mabindzu lama tirhelaka endhawini liya.