MOPANI YI ANGULA SWIHEHLO

MOPANI YI ANGULA SWIHEHLO

Hi Themba Chauke

Masipala wa xifundzantsongo xa Mopani wu angurile eka swihehlo swa vandla ra EFF, swa leswaku ri xupula hi ku hlawula, endzhaku ka ku hlongoriwa ka Mufambisi wa Swa Timali (CFO), Sibongile Peggy Mathebula kambe Mufambisi wa masipala wa ha ri entirhweni.

Ximokonkulu xa vandla ra EFF eMopani, Austin Mabasa, u vula leswaku a swi koteki leswaku munhu un’we a thola khamphani swi nga ri enawini a ri yexe, kumbe ku yiva mali ehandle ko nghenelela ka mufambisi wa masipala. “Loko komiti ya vuahluri yi heta ku hlawula khamphani, hinkwaswo swi rhumeriwa eka mufambisi wa masipala ku swi pasisa. Kuya emahlweni, loko khamphani yi endlile ntirho, tihakelo ti sayineriwa hi mufambisi wa masipala ti nga se ya eka CFO leswaku a endla tihakelo,” wa hlamusela.

“Hikokwalaho a swi koteki eka maendlelo lama yaka emahlweni, ma ku tsandzeka ka mafambiselo, ngopfungopfu loko swi katsa tithendara ta timiliyoni wa tirhandi, ku va swi humelela swi khumbha munhu un’we ntsena. CFO a nga endlanga mhaka leyi a ri swakwe; van’wana vatirhi va ka masipala, vo fana na swirho swa komiti ya vuahluri, mufambisi wa masipala, tikhanselara, xikan’we na tikhamphani, ti va ti hoxile xandla,” ku vula yena.

 “Hikokwalaho EFF, yi lava leswaku ku tekiwa magoza ya xihatla ya vulavisisi eka mhaka leyi leswaku ku kumeka hinkwavo lava khumbhekaka, ku katsa na ku kuma maendlelo hinkwawo ya manyala lama khumbhaka khamphani ya Ximatsatsa Investment,” wa engetela.

Loko a angula eka swihehlo, muvulavuleri wa masipala wa xifundzantsongo, Odas Ngobeni, u kanetile swihehlo leswi a vula leswaku magoza lama tekiweke ku landzeleriwile tindlela hinkwato ta xinawu.

Ngobeni u vule leswaku CFO a langutanile na swiehlo swa nhungu na swona u voniwile nandzu eka nkombo wa swona, leswi katsaka na xihehlo lexikulu ku nga ku honisa hikwalaho ko bumabumela khamphani ya Ximatsatsa Investment (pty) Ltd, ku va yi nghena eka nxaxameto wa thendara hambileswi a swi tiva leswaku khamphani a yi rhumelanga xikombelo xa thendara ya 2022/23-018

“Vumbhoni byi kombisa leswaku CFO, u nyikile swileriso eka vatirhikuloni, mufambisi wa swa vuthori, ku endla mabindzu lama voyamelaka etlhelo ra khamphani ya Ximatsatsa Investment, khamphani leyi a yi nga ri kona loko xipano xi pasisa tikhamphani, na swona a yi nga nghenelelanga eka miphikizano ya tithendara,” wa hlamusela.

Ngobeni u yile emahlweni a vula leswaku CFO, tanihi mutshamaxitulu wa komiti ya vuahluri bya tithendara, u na matimba yo kucetela ku thoriwa ka tikhamphani. “Vandla ra EFF, tanihi vandla ro kaneta ra ximfumo eka huvo, ri swi tiva kahle leswaku mufambisi wa masipala a nga na xandla eka huvo ya vuahluri bya tithendara na swona u hetisisa leswi bumabumeriweke hi komiti,” ku vula yena

 “Eka mhaka leyi, khamphani leyi nyikiweke ntirho wa R4.6 wa timiliyoni a yi nga hlawuriwanga eka tikhamphani kambe yi bumabumeriwile swi nga ri enawini hi CFO, tanihileswi swi paluxiweke eka vulavisisi.” U tlhele a kombisa leswaku mufambisi wa swa vuthori loyi a ri entirhweni hi nkarhi wa kona, na yena u tshamile eka huvo yo tshinya, laha a nyikiweke xilemukiso xo hetelela xo tsariwa, endzhaku ka loko a tirhisanile kahle na vulavisisi xikan’we no nyika vumbhoni ehenhla ka CFO, a vula leswaku a tirha ehansi ka swileriso swa CFO.