KU TLANGELA SIKU RA VAXAVI

Hi Pilot Manganyi

Xifundzakulu xa Limpopo xi tlangerile siku ra vaxavi hi nongonoko wo xiximeka eHotela ya The Ranch, ehandlenyana ka doroba ra Polokwane hi siku ra 12 Nyenyankulu 2026. Nongonoko lowu a wu khomiwile hi Ndzawulo ya Nhluvukiso wa Ikhonomi ya Vaaki, Mbango na Vupfhumba (LEDET), laha ku nga hlangana varhumiwa kusuka eka tindhawu to hambana-hambana. Leswi swi katsa va xinawu, va sirheleri va vaxavi, vayimeri va mabindzu na vatirhisani leswaku va avelana hi makungu ya lembe leri.

Meyara wa Masipala wa Capricorn, Mukhanselara Mamedupi Teffo, u vile na kanelwa hi ku khomela MEC wa LEDET Tshitereke Baldwin Matibe. Eka kanelwa ra yena, meyara u amukerile nhlengeletano hinkwawo wa tiko ra Afrika-Dzonga ku va va hlengeletanile exifundzenikulu xa Limpopo ku va xiphemu xa nongonoko lowu. U tiyisisile nkoka wa ku hlayisa vaxavi hi ku tiyisisa vuxavisi, vutihlamuleri na vululami bya ikhonomi, ngopfungopfu ematikoxikaya.

Teffo u tiyisisile nkoka wa ku tirhisana exikarhi mfumo, va xinawu lava katsaka Khomixini ya Vaxavi ya Tiko (NCC); Valawuri va Swikweleti va Tiko (NCR); Valawuri va Swiyenge swa Timali (FSCA); na ICASA, eka van’wana. U tlherile a kombela leswaku ku langutisiwa mhaka ya swinavetiso wa vuxisi, swimakiwa swa vuxisi, tikondiraka ta vuxisi na lomu ku xaviseriwaka kona. Teffo u boxile leswaku ku tekeriwa enhlokweni ka tifanelo ta vaxavi swi endla leswaku ku va na ku tshembhekelana.

Teffo u tlherile a boxa leswaku ku vile na mphikizano wa njhekanjhekisano exikarhi ka vana va xikolo. “Ku vile na mphikizano exikarhi ka vana va swikolo swa xifundzakulu xa Limpopo laha xikolo xa le henhla xa Taxila, xi nga hlula swikolo hinkwaswo”, ku boxa Teffo.  Mphikizano lowu ku vile xiphemu xa ku tlangela siku ra tifanelo ta vaxavi ra lembe ra 2026.

Teffo u yile emahlweni a khensa vukona bya Yunivhesiti ya Limpopo ku va yi tlangile xiphemu eku humeleriseni na ku pfuneta ndzawulo ya LEDET ku tlangela siku ra vaxavi. Yunivhesiti ya Limpopo yi tlangile xiphemu hi ku amukela no pfumelela LEDET ku va yi khomela kona tihlengeletano ta yona. Hi nkarhi wa nongonoko, vaendzi va nyanyuriwile hi vunanga bya Mahlatsi The Vocalist na ntlawa wa yena. Vaendzi va kombisile ku tsaka na ku langutela swo tala leswi nga ta cinca hi ku famba ka nkarhi tanihi ku hunguteka ka vunavetisi bya vuxisi na tikondiraka to ka ti nga tshamisekanga