WANSATI A GWEVIWA HI VUMBABVA
Hi Themba Chauke
Khoto ya Vugevenga bya Mabindzu ya Giyani yi gwevile wansati wa malembe ya 34, Zandile Nyandeni, malembe ma nhungu ekhotsweni kumbe ndziho wa R400 000, endzhaku ka ku voniwa nandzu eka swihehlo swa nkombo swa vuxisi leswi endliweke etindhawini ta ka Malamulele, eka masipala wa Collins Chabane.
Khoto yi twile leswaku hi siku ra 06 N’wendzamhala 2023, muehliwa u tihlanganisile na mumangari hi riqingo, a n’wi tshembhisa ku n’wi pfuna ku hunguta xikweleti xakwe xa le ka WesBank, endzhaku ko n’wi xisa a vula leswaku u hlawuriwile tanihi khasimende yo tshembheka ya bangi.
Mumangari u tshembhile mavunwa lawa, tanihileswi riqingo leri a ri fona a ri kombisa leswaku i ra “Zandile Nyandeni-WesBank.” Muhehliwa un’wi lerisile ku chela mali ebangi, leswaku a ta sungula migingiriko ya matsalwa.
Mutwisiwa ku vava u pfumerile laha a nga rhumela mali ya ntsengo wa R312 000, exikarhi ka 06 N’wendzamhala 2023, na ti 15 Sunguti 2024. Kambe loko a ta lemuka leswaku u lo humbiwa mano, u mangarile mhaka leyi emaphoriseni. Nandzu wu nyikiwile Kaputeni Thomas Maluleke kusuka eka Xiyenge xa Vulavisisi bya Vugevenga bya Mabindzu eka Xifundzakulu xa Limpopo.
Vulavisisi byi ve byi paluxa leswaku muhehliwa a nga thoriwanga eWesBank, kambe u tshame a tirha eka tikhamphani ta ndhawu ya tiqingo eRandburg, eGauteng. Swi tlhele swi kumeka leswaku mali yi hoxiwile eka akhawunti ya bangi yakwe.
Ku humile xileriso xo n’wi khoma, laha a nga kumeka elokixini ra Alexandra, eGauteng, hi 04 Khotavuxika 2024. U ve a humesiwa hi beyili ya R10 000 hi siku ra 21 Khotavuxika 2024. Kasi hi siku ra 09 Nyenyankulu 2026, u tivonile nandzu eka swihehlo swa nkombo swa vuxisi a tlhela a kombela ku rivaleriwa eka mumangari.
Hi ku tekela enhlokweni ku titsongahata eka vugevenga lebyi a byi endleke, Khoto ya Vugevenga bya Mabindzu ya Giyani yi n’wi marhekile ndziho wa R400 000 kumbe ku tshamba ekhotsweni malembe ma nhungu. Muhehliwa u tsandzekile ku hakela ndziho na swona se u sungurile ku tirhela xigwevo xa yena.
Khomixinara wa mphorisa ya xifundzakulu xa Limppopo, Lieutenant Jenerali Thembi Hadebe, u amukerile xigwevo lexi a tlhela a hlohletela vaaki ku va na vuxiyaxiya loko swi ta eka timhaka to fambelana na swa timali va nga se endla tihakelo.