HOSI DZUMERI A SIVELA NGOMA EKA KHAXANI

Hi Themba Chauke

Hosi Dzumeri u kanetana na makungu yo endla ngoma ya va xinuna emugangeni wa ka Khaxani, leswi ku vuriwaka leswaku swi rhangeriwa hi ndhuna ya vuxisi leyi tirhisanaka na yin’wana ya tihosi eGiyani, lava nga le ka nkwetlembetano wa vuhosi na yena.

Un’wana wa tindhuna ta ka Khaxani u endlile xikombelo xa ngoma ehandle ka vutivi bya Hosi Dzumeri, leswi tisaka swivilelo mayelana na xinawu xa xikombelo lexi. Hi ntolovelo, xikombelo xo endla ngoma xi fanele ku pasisiwa hi vaaki, kutani xi bumabumeriwa hi Hosi (Hosi Dzumeri) swi nga se yisiwa eka CoGHSTA ku pasisiwa ximfumo. Maendlelo lawa a ma landzeleriwanga, leswi endleke leswaku Hosi Dzumeri a yisa xikombelo xo kanetana na ku pasisiwa ka ngoma.

Loko va vulavula hi nkarhi wa nhlengeletano emugangeni wa ka Khaxani, xipano xo hlawuleka xa ka Dzumeri xi byerile vaaki hi mhaka leyi. Adam Mabunda kusuka eka yindlu ya vuhosi bya mfumo xivongo xa ka Dzumeri u byerile nhlengeletano tindlela leti tekiweke ku sivela xikombelo. “Hi rhumerile papila eka CoGHSTA, ku sivela swikombelo swimbirhi swo khoma tingoma emigangeni ya ka Khaxani na le ka Mushiyani, leyi welaka ehansi ka vulawuri bya Hosi Dzumeri,” ku vula yena.

“Swikombelo swa hina swo sivela tingoma letimbirhi swi landzelela nawu, Ku na maendlelo mo hlaya lama nga tshamisekangiki na swona a va landzelelanga swilaveko swa xinawu, leswi hi swona swi endleke leswaku hi nghenelela ku yimisa migingiriko leyi ku ya emahlweni,” ku vula Mabunda. U tlhele a kombisa ku tshembha leswaku vuhosi byi ta swi kota ku yimisa swikombelo leswimbirhi.

Hi ku angula, un’wana wa vaaki va muganga wa ka Khaxani, Rich Makhubele, u amukerile xitiviso na ku basisiwa kusuka eka xipano xo hlawuleka xa vuhosi bya ka Dzumeri, laha a vuleke leswaku leswi swi ta pfuna ku hambanyisa exikarhi ka varhangeri va ntiyiso na va vuxisi lava xisaka vaaki.

“Tanihi vaaki va le mugangeni, hi tsakile leswaku hofisi ya vuhosi yi basisile mhaka leyi ximfumo mayelana na xikombelo xa ngoma. Hi tiyimiserile ku tirhela Hosi Dzumeri, na swona loko a vula leswaku a ku nge vi na ngoma, swi ta va tano,” ku vula yena. Kasi muvulavuleri wa xipano xo hlawuleka xa vuhosi bya ka Dzumeri Pat Mabunda, u lemukisile leswaku un’wana na un’wana loyi a xisaka vaaki a tiendla ndhuna ku tekela ehansi Hosi Dzumeri u ta tekeriwa goza. “Ndzi lava ku tiyisisa leswaku a ku nge vi na ngoma emugangeni lowu, kumbe yin’wana ehandle ka vutivi xikan’we na mpfumelelo wa Hosi Dzumeri. Loko un’wana o lava ku teka nawu a wu veka emavokweni ya yena yo endla ngoma la, hi ta teka goza.”

“Mi fanele ku twisisa leswaku la mi nga kona hi le ka ndhawu ya van’wana vanhu, na swona mi fanele ku landzelela nawu. Loko mi nga landzeleri nawu, mhaka yi olovile, longani mi famba. Mi nga yimeli hina hikuva a swi nge tsakisi,” wa gimeta.