Nkowankowa Continental yi hlula
Hi Themba Chauke
Xipano xa bolo ya milenge xa Nkowankowa Continental xi hlurile ro sungula eka ligi eka nguva leyi endzhaku ko hlula xipano xa le kaya Vondwe Xi Bullets hi 2-0. Ku hlula loku ku ta hi nkarhi lowu ku saleke mitlangu yimbirhi nguva yi nga si fika emakumu, leswi tiseke ku hefemula eka xipano lexi ku nga khale xi ri etshakwini ra tafula.
Loko ku kongomiwa eka ntlangu lowu, vanhu vo tala a va hetile va vula leswaku Continental yi ta lehlekeriwa hi ntlangu. A va tlanga kule na le kaya na xin’wana xa swipano leswi tlangaka kahle swinene eka ligi, xikan’we na matlangelo ya vona yo khomisa tingana leswi endleke leswaku vanhu vo hlaya va langutela leswaku xi hluriwa.
Xipano xa Vondwe Xi Bullets, lexi a xi tlanga ekaya, xi tikombile xi tekerile xipano xa vaendzi ehansi, tanihileswi xi nga le ka xiyimo xa kahle eka ligi, swi tikomba va hoxile vatlangi vo vevuka, hi ku tiva leswaku swi ta va olovela ku hlula.
Kambe leswi a va swi tekerile ehansi a ku ri xipano lexi vavisekeke swinene, lexi a xi lwela ku vuyisa xindzhuti, xipano xa Continental xi nghenile endzeni ka rivala xi tiyimiserile, hi ku lava ku papalata ku heta nguva ehandle ko hlula ka mhamba.
Kusukela loko mpempe yi ba, vaendzi va kombisile ndlala yo lava ku hlula ku hambana na mitlangu leyi hundzeke. Va hlaserile ku ya emahlweni hi xikongomelo laha va howiseke ntlangu wu nga si ya ekule. Ku nga si hela nkarhi, laha ndlati yi nga ba kona yi tlhele yi vuya nakambe, leswi siyeke vatlangi na vahlaleri va Vondwe Xi Bullets, va tikhome xihlaya. Loko xipano xa le kaya xi pfuka ematandzeni hi ku yisa ntshikelelo, xipano xa Continental a xi sivela hi ku tiyimisela ku kondza ntlangu wu fika emakumu.
Loko ntlangu wu fika emakumu, swi kombisile nkarhi wa nkoka eka xipano. A ku ri ro sungula ku va xipano xa Continental xi hlula, vatlangi va xipano va huma erivaleni na n’wayitelo, tanihileswi va nantsweke kuhlula ro sungula.
Mbuyelo wu va tlakusile kusuka eka mikutlunya ya mune ku ya eka nkombo, leswi endleke leswaku va tikuma va ri endzhaku ka xipano xa Lebash Academy hi mikutlunya yinharhu, xin’wana xa swipano leswi tikeriwaka lexi na xona xi langutaneke na xihloka.
Eka yin’wana mitlangu, Selwana White Vultures 2-2 Mpheni Home Defenders; Tzaneen United na Mukondeni Young Chiefs 2-2; Baduzah Celtics na Dolphins 0-0.